London, 7 yanvar, AZƏRTAC
Böyük Britaniyanın Baş naziri Kir Starmer bildirib ki, sülh razılaşması əldə olunacağı təqdirdə Ukraynaya britaniyalı hərbçilərin göndərilməsi məsələsi parlamentdə səsverməyə çıxarılacaq.
AZƏRTAC xəbər verir ki, Baş nazirin sözlərinə görə, bu yanaşma hərbi əməliyyatlarla bağlı qərarların parlamentdə müzakirə olunmasına dair son illərdə formalaşmış praktikaya uyğundur. O qeyd edib ki, belə bir addım yalnız Böyük Britaniyanın mövcud hərbi planları çərçivəsində və müvafiq şərtlər daxilində nəzərdən keçirilə bilər.
Hərbçilərin Ukraynaya göndərilməsi məsələsi Böyük Britaniya və Fransanın Ukrayna ilə bağlı mümkün razılaşma əldə olunacağı halda, Rusiyanın yenidən hücumlarının qarşısını almaq məqsədilə təhlükəsizlik mexanizmləri üzərində müzakirələr aparması fonunda gündəmə gəlib. Bununla belə, Kir Starmer mümkün kontingentin sayı ilə bağlı hər hansı açıqlama verməyib.
Parlamentdə “Baş nazirə suallar” sessiyası zamanı o bildirib ki, sülh razılaşması əldə edilərsə, britaniyalı hərbi heyətin Ukraynada çəkindirici xarakterli fəaliyyətlərdə iştirakı və müttəfiqlərin yaratmağı planlaşdırdığı hərbi obyektlərin mühafizəsi nəzərdən keçirilə bilər.
Baş nazir, hərbçilərin göndərilməsi ilə bağlı qərardan əvvəl səsvermənin dəqiq vaxtı barədə açıqlama verməsə də, onun mətbuat katibi bildirib ki, Böyük Britaniya silahlı qüvvələrinin hər hansı uzunmüddətli yerləşdirilməsi yalnız parlamentin müzakirəsindən sonra mümkün ola bilər.
Qeyd olunub ki, Böyük Britaniyada hərbi əməliyyatların hüquqi baxımdan təsdiqi Baş nazirin səlahiyyətinə daxildir. Bununla yanaşı, son onilliklərdə formalaşmış siyasi ənənəyə əsasən, bu cür qərarların parlamentdə müzakirəyə çıxarılması praktikası mövcuddur, baxmayaraq ki, bu prinsip hər zaman ardıcıl şəkildə tətbiq edilməyib.
AZƏRTAC-ın xüsusi müxbiri
