"İranda başlayan etirazlar sözsüz ki, ölkənin siyasi və iqtisadi sabitliyini təhdid edən ciddi bir böhranı ifadə edir. Etirazların xüsusiyyətləri və miqyası göstərir ki, bu proses təkcə sosial hadisə deyil, eyni zamanda siyasi sistemin etibarlılığını və dövlətin idarəetmə qabiliyyətini sarsıdan genişmiqyaslı problemə çevrilib. Bu hadisələrin İranın siyasi sistemi və gələcəyi baxımından dərindən təhlil edilməsi olduqca vacibdir. Məlumdur ki, İranda mövcud olan sosial və iqtisadi böhranın əsasları çoxsaylı struktur problemlərindən qaynaqlanır. Son illərdə inflyasiyanın artması və iqtisadi çətinliklər, xüsusilə milli valyutanın dollar qarşısında kəskin dəyər itirməsi əhalinin alıcılıq qabiliyyətini ciddi şəkildə zəiflədib. Hakimiyyətin etirazlara verdiyi cavablar isə əsasən təhlükəsizlik qüvvələri vasitəsilə güc tətbiqi ilə müşayiət olunub".
Bu fikirləri Aznews.az-a açıqlamasında siyasi şərhçi Rəşad Bayramov deyib.
Qeyd edək ki, İranda dekabrın 28-dən milli valyutanın dollara qarşı kəskin ucuzlaşması ilə başlayan etirazlar artıq 11 gündür davam edir. Məlumatlara görə, aksiyalar zamanı 36 nəfər ölüb, onlarla insan yaralanıb, 2 076 nəfər saxlanılıb, lakin rəsmi açıqlama verilməyib. Hökumətin etirazçılara təklif etdiyi 7 dollarlıq yardım ciddi narazılıq doğurub. Gərginlik fonunda Rza Pəhləvi hakimiyyətin legitimliyini itirdiyini bəyan edib, ABŞ və İsrail isə İranın nüvə proqramı ilə bağlı sərt mövqelərini açıqlayıblar.
Siyasi şərhçi qeyd edib ki, bu cür repressiv yanaşmaların uzun müddət davam etməsi çətin görünür, çünki cəmiyyətin müxtəlif təbəqələrinin tələbləri və narazılıqları getdikcə dərinləşir.
