Bu gün Azərbaycanın Milli Qəhrəmanı, fədakar jurnalist Salatın Əsgərovanın anım günüdür.
Missiya.Az xatırladır ki, o, peşə fəaliyyətini həyatının mənasına çevirən, sözün gücü ilə həqiqəti üzə çıxarmağa çalışan cəsur bir qələm sahibi idi. Salatın Əsgərova Azərbaycan mətbuatında öz prinsipial mövqeyi, obyektivliyi və vətənpərvərliyi ilə seçilirdi.
O, uzun illər müxtəlif mətbuat orqanlarında çalışaraq ölkədə baş verən ictimai-siyasi prosesləri, xüsusilə də Qarabağ münaqişəsi dövründə cəbhə bölgəsindəki real vəziyyəti işıqlandırmışdır. Salatın Əsgərova müharibənin ilk illərində xalqın səsini, ağrı-acısını və həqiqətlərini dünya ictimaiyyətinə çatdırmaq üçün böyük risklərə baxmayaraq ön cəbhəyə yollanır, reportajlar hazırlayırdı. Onun yazıları faktlara əsaslanan, milli maraqları müdafiə edən və cəmiyyətə təsir gücü olan materiallar idi.
Salatın Əsgərova jurnalistikanı sadəcə peşə kimi deyil, vətənə xidmət missiyası kimi qəbul edirdi. O, informasiya blokadasının yarıldığı bir dövrdə erməni təcavüzünün mahiyyətini ifşa etməyə, günahsız insanların taleyini beynəlxalq ictimaiyyətin diqqətinə çatdırmağa çalışırdı. Məhz bu fədakar fəaliyyəti onun adını Azərbaycan jurnalistikasının şərəf səhifələrinə həkk etdi.
1991-ci ildə xidməti vəzifəsini yerinə yetirərkən şəhid olan Salatın Əsgərova, ölümündən sonra Azərbaycanın Milli Qəhrəmanı adına layiq görüldü. Onun cəsarəti, prinsipial mövqeyi və peşəsinə sədaqəti bu gün də jurnalistlər və gənclər üçün əsl nümunədir.
Salatın Əsgərova həqiqət naminə canından keçənlərin simvoluna çevrilib və onun əziz xatirəsi xalqımızın yaddaşında daim yaşayacaq.
İlahə Qənbərli
Missiya.Az
