Azpolitika.az portalından verilən məlumata əsasən, ain.az bildirir.
Rusiya Xarici İşlər Nazirliyi yanvarın 6-da Fransa, Böyük Britaniya və Ukrayna nümayəndələri tərəfindən imzalanmış və “Paris Bəyannaməsi” adlandırılan sənədi kəskin tənqid edib. Moskva bir daha Qərb ölkələrinin hərbi kontingentinin Ukrayna ərazisində yerləşdirilməsinin Rusiya üçün qətiyyən qəbuledilməz olduğunu bəyan edib.
Rusiya XİN-in rəsmi nümayəndəsi Mariya Zaxarovanın sözlərinə görə, sənəd sülhə deyil, münaqişənin daha da dərinləşməsinə xidmət edir. O bildirib ki, “sənəd möhkəm sülh və təhlükəsizliyə nail olmağa yox, militarizasiyanın davam etdirilməsinə, eskalasiyaya və münaqişənin genişlənməsinə yönəlib”.
Zaxarova vurğulayıb ki, Ukrayna ərazisində Qərb ölkələrinin hərbi bölmələrinin, hərbi obyektlərinin, silah anbarlarının və digər infrastrukturunun yerləşdirilməsi Rusiya tərəfindən “xarici müdaxilə” kimi qiymətləndiriləcək. Onun sözlərinə görə, bu cür bölmələr və obyektlər Rusiya Silahlı Qüvvələri üçün “qanuni hərbi hədəf” hesab olunacaq.
Rusiya XİN-in açıqlamasında diqqət çəkən məqamlardan biri də ondan ibarətdir ki, Fransa və Böyük Britaniyanın daxil olduğu “istəklilər koalisiyası” beynəlxalq hərbi kontingentin Ukraynaya yalnız Rusiya ilə atəşkəs barədə razılaşma əldə edildikdən sonra yerləşdirilməsini planlaşdırır. Yəni bu qüvvələrin birbaşa döyüş əməliyyatlarında iştirak etməyəcəyi qeyd olunur. Lakin Rusiya Xarici İşlər Nazirliyinin bəyanatında bu məqam xüsusi olaraq vurğulanmır.
Bəyanatda Moskvanın münaqişənin başa çatması ilə bağlı əvvəlki şərtləri də təkrar edilib. Bu şərtlər sırasında Ukraynanın “demilitarizasiyası və denasifikasiyası”, eləcə də “mövcud ərazi reallıqlarının” tanınması yer alır. Sözügedən “ərazi reallıqları” Rusiya tərəfindən Ukrayna ərazilərinin anneksiyasının tanınması anlamına gəlir.
Qeyd edək ki, Ukrayna üçün təhlükəsizlik zəmanətlərində iştirak edəcəyini vəd edən ABŞ Paris Bəyannaməsini imzalamayıb. Rusiya XİN-in açıqlamasında da Vaşinqtonun adı çəkilmir.
Bu arada Britaniyanın “The Times” qəzeti yazır ki, London və Paris Ukraynaya 15 minə qədər hərbçi göndərməyi planlaşdırır. Bu rəqəm əvvəl müzakirə olunan göstəricilərdən xeyli azdır. Qəzetin qeyd etdiyi kimi, hətta 7,5 min hərbçinin belə bu missiya üçün cəlb edilməsi Böyük Britaniya üçün ciddi çətinlik yarada bilər. ABŞ və bir sıra Avropa ölkələri isə Ukraynaya öz qoşunlarını göndərməyi istisna ediblər.
Xatırladaq ki, təhlükəsizlik zəmanətləri Ukraynanın ABŞ-ın təkliflərinə əsaslanan mümkün sülh sazişini imzalaması üçün əsas şərtlərdən biridir. Moskva isə dəfələrlə Ukraynada Qərb hərbçilərinin yerləşdirilməsinin yolverilməz olduğunu bəyan edib.
Bununla yanaşı, ABŞ rəsmilərinin mediaya sızan açıqlamalarında Rusiyanın kompromis çərçivəsində bu məsələyə sonda razı ola biləcəyi ehtimalı da istisna edilmir. Vaşinqton üçün Moskva ilə danışıqlarda daha həssas mövzunun ərazi nəzarəti, xüsusilə də Donetsk vilayəti olduğu bildirilir.
“AzPolitika.info”
Daha ətraflı məlumat və yeniliklər üçün ain.az saytını izləyin.
