Mərakeş Gənclər, Mədəniyyət və Kommunikasiya Nazirliyində alimlərin Homo sapiens (ağıllı insan) və neandertalların güman edilən ən ehtimal olunan ümumi əcdadının skelet fraqmentləri hesab etdiyi daşlaşmış qalıqların hissələri təqdim edilib. Beynəlxalq arxeoloji ekspedisiya qədim qalıqları krallığın Atlantik sahilində, Kasablanka şəhəri yaxınlığındakı "Tomas-1" karxanasında aşkar edib. Oxuməni.az-ın məlumatına görə, bu barədə TASS xəbər verib.
Tapıntıya yetkin insanın alt çənəsinin hissəsi, uşağın tam alt çənəsi, bud sümüyünün hissəsi, bir neçə diş və fəqərə daxildir. Tədqiqat məlumatlarına görə, onlar 700 min ildən 773 min ilə qədər olan dövrə aiddir.
TASS-a müsahibəsində layihənin rəhbərlərindən biri, Mərakeş Arxeologiya və İrs Milli İnstitutunun professoru Abderrahim Muhibin dediyinə görə, ən mürəkkəb elmi ekspertiza və elektromaqnit şüalanma ilə aparılan tədqiqatlar göstərib ki, bu qalıqlarda Homo erectus (düz duran insan, müasir insanların birbaşa əcdadı hesab olunur) üçün səciyyəvi olan elementar morfoloji xüsusiyyətlər, Homo sapiens-in xüsusiyyətlərinə morfoloji cəhətdən bənzəyən daha inkişaf etmiş elementlərlə birləşir. Onun sözlərinə görə, tapıntı "müasir insanın təkamülünü anlamaqda ən vacib halqa və Avropada aşkar edilmiş digər insan formalarının inkişafına səbəb olan "bacı xətti"dir".
Muhib kəşfin əhəmiyyəti barədə danışarkən bildirib ki, qalıqlar insanın əsas inkişaf xətlərinin ayrıldığı dövrə uyğundur: Homo sapiens-in yaranmasına səbəb olan Afrika xətti və məsələn, neandertalların qolunu vermiş Avrasiya xətti. Onun fikrincə, məhz buna görə tapılmış daşlaşmış qalıqlar "Homo sapiens və neandertalların ümumi əcdadı roluna ən ehtimal olunan namizədlər olan insanların qalıqları" ola bilər.
Almaz Həsənli
