Pezeşkiyan məscidlərin yandırılmasını qınaylb və cəmiyyətin bu cür hərəkətləri qəbul etmədiyini bildirib...
Poliqon xəbər verir ki, İran Prezidenti Məsud Pezeşkiyan ölkədə davam edən iğtişaşlar fonunda vətəndaşlara müraciət edərək, qanunsuzluqlara və zorakılıq hallarına qarşı etiraz mövqeyini açıq şəkildə ifadə etməyə çağırıb. Prezidentin sözlərinə görə, dinc etirazlarla vandalizm və dini məkanların hədəfə alınması eyni şey deyil və bu cür hərəkətlər İran cəmiyyətinin dəyərlərinə ziddir.
Pezeşkiyan xüsusi olaraq vurğulayıb ki, məscidlərin və digər dini obyektlərin yandırılması qəbuledilməzdir və belə addımlar nə ictimai dəstək qazanır, nə də legitim sayılır. O bildirib ki, “iranlılar müqəddəs məkanlara əl qaldıran, xaos və qorxu yaratmağa çalışan şəxsləri qəbul etmir”.
Prezidentin fikrincə, cəmiyyət öz mövqeyini açıq şəkildə ortaya qoymalı, iğtişaşlar və zorakılıq yolu ilə sabitliyi pozmağa çalışan qruplara qarşı birliyini nümayiş etdirməlidir. O, dövlət institutlarının asayişi qorumaq üçün fəaliyyət göstərdiyini, lakin ictimai həmrəyliyin də həlledici rol oynadığını qeyd edib.
Rəsmi dairələr hesab edir ki, bu çağırış ölkədə gərginliyin azaldılmasına və dinc mövqenin güclənməsinə xidmət edir. Hakimiyyət nümayəndələri bir daha bəyan ediblər ki, legitim etiraz hüququ tanınır, lakin zorakılıq, dağıntı və dini dəyərlərə hörmətsizlik qəti şəkildə rədd olunur.
Poliqon.info
