İranlı rejissorlar Cəfər Pənahi və Məhəmməd Rəsulof ölkələrindəki müxalifət etirazçılarına dəstəklərini bildiriblər.
Hafta.az yazır ki, sosial mediada yayımlanan birgə bəyanatda hər ikisi İrandakı internet və telefon kəsintilərini "repressiyanın açıq bir vasitəsi" kimi tənqid ediblər.
Onlar iddia ediblər ki, bu addım fəalların bir-biri ilə ünsiyyət qurmasının qarşısını almaq, xarici dünya ilə əlaqəni kəsmək və etirazçılara qarşı zorakılığı gizlətmək məqsədi daşıyır.
Rejissorlar beynəlxalq ictimaiyyətə, insan haqları təşkilatlarına və mediaya müraciət edərək İranda baş verənləri izləməyə və İran xalqının kommunikasiya platformalarına çıxışını təmin etməyə çağırıblar.
65 yaşlı Pənahi ötən ay "təbliğat fəaliyyəti" ittihamı ilə qiyabi olaraq bir il həbs cəzasına məhkum edilib. Hazırda xaricdə olsa da, o, ölkəsinə qayıtmağı planlaşdırdığını deyir.
Əvvəllər həbs cəzasından apelyasiya şikayəti verən Məhəmməd Rəsulof 2024-cü ildə ölkədən qaçıb. 53 yaşlı rejissor o vaxtdan bəri Avropada mühacirətdədir.
İranda anadan olan Britaniya vətəndaşı Soheyla Soxanvari də sosial mediada fikirlərini bölüşüb. İranlı dissident qadınların portretlərini çəkməsi ilə məşhur olan çoxsahəli rəssam deyib: "İranda silahsız günahsız insanlar kobud güc və canlı sursatla hədəfə alınır və bu hərəkətlər cəzasız qalır. Bu, etiraz deyil, inqilabdır. Xahiş edirəm onların səsi olun".
62 yaşlı Soxanvari İran İslam Respublikasına beynəlxalq təzyiq göstərməyin vacibliyini vurğulayıb.
Dissidentləri dəstəkləyənlər arasında iranlı aktrisa Golşifteh Fərəhani də var. Xaricdə çəkdiyi filmlərdə təvazökar geyinmədiyi üçün uzun müddət Fransada mühacirətdə yaşayan 42 yaşlı aktrisa İnstaqram hesabında etirazçıların müqavimətini tərifləyib.
Ridli Skottun 2008-ci ildə çəkdiyi “Yalanların bədəni” filmində Leonardo Di Kaprio ilə birlikdə rol alan Fərahani, 1979-cu il inqilabından bəri məşhur bir Hollivud filmində rol alan ilk iranlı aktrisa olub.
İranda anadan olan britaniyalı komediyaçı Omid Cəlili "The News Agents" podkastında iddia edib ki, təhlükəsizlik qüvvələri döyüş sursatı ilə hücum edərkən, bir çox videoda etirazçıların onları təqib etdiyi görünür.
Tehranın Böyük Bazarındakı tətil, İran rialının açıq bazarda ABŞ dollarına qarşı rekord səviyyədə aşağı düşməsindən sonra, 28 dekabrda başlayıb. Tələbələrin iştirakı ilə böyüyən etirazlar, İran prezidenti Məsud Pezaşkianın dialoq çağırışlarına baxmayaraq davam edir.
ABŞ-da yerləşən İran İnsan Haqları Fəalları Xəbər Agentliyi (HRANA) iki həftəlik etirazlarda ən azı 116 nəfərin öldüyünü bildirir.
İnternet və telefon kəsintilərinin geniş yayıldığı ölkədə 2600 nəfərin saxlanıldığı da iddia edilir.
