2025-ci ilin dekabr ayının nəticələrinə əsasən, Rusiyada neft hasilatı gündə 100 min bareldən çox azalaraq 9,326 milyon barelə enib.
AZƏRTAC xəbər verir ki, “Bloomberg” agentliyi bu barədə Rusiya hökumətindəki mənbələrinə istinadla məlumat yayıb. Məlumata görə, bu nəticə son 18 ayın ən aşağı göstəricisidir və Rusiyanın OPEC+ kvotaları çərçivəsində gündəlik neft hasilatından 250 min barel azdır.
Agentlik qeyd edir ki, azalma Rusiyanın neft anbarlarına və neft emalı infrastrukturuna davamlı dron hücumları və neft ixracı satışlarında yaranan problemlər fonunda baş verir. ABŞ-ın xam neft ixracatçılarına qarşı sanksiyalarından sonra bəzi alıcılar Rusiyadan neft almaqdan imtina edirlər.
Qeyd edək ki, “Goldman Sachs” investisiya bankının son proqnozuna görə, 2026-cı ilin sonunadək Brent markalı xam neftin qiyməti 54 dollara, WTI markalı xam neftin qiyməti isə 50 dollaradək ucuzlaşacaq. Analitiklər hesab edirlər ki, Rusiya, Venesuela və ya İrandakı geosiyasi risklər ucuzlaşmanın qarşısını ala bilər.
