Ağ Evdə planlaşdırılan görüş ABŞ–Venesuela münasibətləri və müxalifətin gələcək rolu baxımından diqqət çəkir...
ABŞ prezidenti Donald Tramp cümə axşamı Ağ Evdə Venesuela müxalifətinin lideri Mariya Korina Maçado ilə görüşəcək.
Poliqon xəbər verir ki, bu barədə CNN telekanalının müxbiri Alayna Trin ABŞ prezident administrasiyasında yüksək vəzifəli mənbəyə istinadla məlumat yayıb. Görüşün Vaşinqtonun Venesueladakı siyasi proseslərə münasibəti, eləcə də ölkədəki müxalif qüvvələrlə mümkün əməkdaşlıq perspektivləri baxımından əhəmiyyətli olduğu bildirilir.
Məlumata görə, Tramp daha əvvəl verdiyi açıqlamalarda Maçadonun Venesuelaya liderlik edə bilməyəcəyini söyləmişdi. O, Maçadonu “yaxşı qadın” kimi xarakterizə etsə də, ölkə daxilində kifayət qədər geniş ictimai-siyasi dəstəyə malik olmadığını vurğulamışdı. ABŞ prezidentinin bu mövqeyi Vaşinqtonun Venesuela müxalifətinə yanaşmasında ehtiyatlı xətt yürütməyə çalışdığını göstərirdi.
Öz növbəsində Mariya Korina Maçado müxtəlif çıxışlarında ABŞ-ın Venesueladakı demokratik proseslərə verdiyi dəstəyi yüksək qiymətləndirdiyini bildirib. O, həmçinin bir vaxtlar Nobel Sülh Mükafatına layiq görüləcəyi təqdirdə bu mükafatı ABŞ prezidenti ilə bölüşmək istədiyini açıqlayıb. Analitiklər hesab edirlər ki, planlaşdırılan görüş Tramp administrasiyasının Venesuela məsələsində mövqeyinin yenidən nəzərdən keçirilməsi və müxalifətlə münasibətlərin hansı istiqamətdə inkişaf edəcəyinə dair mühüm siqnallar verə bilər.
Poliqon.info
