Moskvanın Xarkova zərbələrində ballistik raketlər və dronlardan istifadə edilib...
Poliqon xəbər verir ki, yanvarın 13-nə keçən gecə Rusiya hərbçiləri Xarkovun ətrafındakı “Nova Poçta” terminalına həm ballistik raketlər, həm də intihar dronları ilə kombinə olunmuş hücum həyata keçiriblər. Xarkov vilayət hərbi administrasiyasının rəhbəri Oleg Sinequbovun məlumatına görə, hadisə nəticəsində dörd nəfər həlak olub, altı nəfər müxtəlif dərəcəli xəsarət alıb.
Ukrayna Fövqəladə Hallar Dövlət Xidmətinin (FHDX) bildirdiyinə görə, zərbə nəticəsində terminalın binaları dağılıb, təxminən 500 kvadratmetr ərazidə yanğın baş verib. Hadisə yerindən ümumilikdə 30 nəfər xilas edilib, iki nəfər dağıntılar altından çıxarılıb.
FHDX bildirib ki, fövqəladə-xilasetmə işləri və yanğının söndürülməsi davam edir, işçilər düşmənin davamlı atəş təhlükəsi altında fəaliyyət göstərirlər. Xarkov vilayət prokurorluğu tərəfindən yayımlanan videolarda loqistika mərkəzinin geniş dağıntıları və yanmış yük maşınları görünür. Prokurorluğun nümayəndəsi Dmitri Yatsıçenko bildirib ki, Rusiya hərbçiləri poçt terminalına hücum zamanı “ikiqat zərbə” taktikasından istifadə edib: əvvəlcə ballistik raket, sonra isə intihar dronları işə salınıb.
Bundan əlavə, keçən gecə Rusiya hərbçiləri Xarkov şəhərini də dronlarla atəşə tutub. Şəhərin Şevçenkov rayonundakı uşaq sanatoriyasına dronlardan biri düşüb və orada yanğın başlayıb. Xarkov meri İqor Terehov bildirib ki, ilkin məlumata görə, sanatoriyada xəsarət alan olmayıb. Hadisədən əvvəl Ukraynanın əksər bölgələrində Rusiya ərazisindən atılan ballistik raketlər və döyüş dronları səbəbindən hava həyəcanı elan olunmuşdu.
Poliqon.info
