“2025-ci ilin dekabr ayının ortalarından etibarən Ermənistan Azərbaycan istehsalı olan benzin idxal etməyə başlayıb. Premium dərəcəli benzin əsasən Azərbaycandan idxal olunur. Ermənistan bazarında bu növ benzinin ən aşağı qiyməti 15% azalıb”.
Ölkə.az xəbər verir ki, bunu Ermənistanın baş naziri Nikol Paşinyan Azərbaycandan yanacaq tədarükü ilə bağlı tənqidlərə cavab verərkən deyib.
O, iki gün əvvəl Azərbaycandan Ermənistana dizel yanacağının idxal edildiyini bildirib.
“Dizel yanacağının ən aşağı qiyməti 2% düşüb. Adi benzinin qiyməti də dekabr ayı ilə müqayisədə təxminən 8% düşüb (11 dekabrda adi benzinin bir litri 500 dram idi, indi isə 460 dramdır). Bu, sülh gündəliyinin və onun faydalarının nəticəsidir”, - Paşinyan qeyd edib.
O, həm Ermənistanda, həm də Azərbaycanda bu məsələ ilə bağlı tənqidlərin olduğunu etiraf etdi.
Paşinyan Ermənistanla Azərbaycan arasında sülhün bərqərar olduğunu və zamanla daha da institusional hala gələcəyini nəzərə alaraq, bu narahatlıqların əsassız olduğunu bildirib.
“Ermənistanda bu narahatlıq illərdir benzin bazarını inhisarda saxlayan şirkətlər və maraqlar tərəfindən qızışdırılır. İndi onlar qiymətləri aşağı salmalı olacaqlar ki, bu da inhisarçılara zərər verəcək və onların tamamilə yox olmasına səbəb olacaq. Ermənistan vətəndaşları bundan faydalanacaqlar. Bu, dünyadır və biz orada yaşamağı və bundan faydalanmağı öyrənməliyik ki, Ermənistan da məhz bunu edir”, - Paşinyan bildirib.
Mürtəza
