Avropa və Şimali Amerika ölkələrinin rəhbərləri Davosda ABŞ prezidenti ilə görüşdə Ukraynanın müdafiəsi üçün razılıq almağa çalışacaq...
Poliqon xəbər verir ki, Financial Times qəzetinın məlumatına görə, “Böyük Yeddilik” (G7) ölkələrinin liderləri yanvarın 19–23-də Davosda keçiriləcək Dünya İqtisadi Forumuna qatılacaq və ABŞ Prezidenti Donald Trampdan Ukraynaya təhlükəsizlik zəmanətləri verən sazişi imzalamağı xahiş edəcəklər.
Qəzet yazır ki, Avropa liderləri Tramp və Ukrayna Prezidenti Vladimir Zelenski arasında Davosda mümkün görüşdə iştirak etməyi planlaşdırır. Bu görüşün gələn həftə çərşənbə günü baş tuta biləcəyi bildirilir. Danışıqlarda İtaliya, Almaniya, Fransa, Kanada və Böyük Britaniya liderləri, həmçinin Avropa Komissiyasının sədri Ursula fon der Lyayen də iştirak edə bilər.
Məqsəd Trampdan Parisdə keçirilən sammitdə təsdiqlənmiş Ukraynaya təhlükəsizlik zəmanətləri deklarasiyasının qəbulunu təmin etməkdir. Lakin FT yazır ki, Avropa paytaxtlarında ABŞ Prezidentinin Rusiyaya qarşı mümkün sülh razılaşmasından sonra Ukraynanı dəstəkləməyə nə qədər sadiq olduğu barədə dəqiqlik yoxdur, çünki keçən il Tramp bir neçə dəfə açıq şəkildə pro-Rusiya mövqeyi nümayiş etdirib.
Paris sammitində “istəkli koalisiya” iştirakçıları Ukraynaya Qərb sülhməramlı qüvvələrinin göndərilməsini təsdiqləyiblər, lakin bu yalnız döyüş əməliyyatlarının dayandırılmasından sonra mümkün olacaq. Xüsusilə, Fransa və Böyük Britaniya hərbçilərini göndərməyi planlaşdırır. Bir Avropa rəsmisi FT-yə bildirib ki, “Bunların heç biri ABŞ olmadan baş verməyəcək və Trampın nə düşündüyü hələ də qeyri-müəyyəndir”.
Eyni zamanda, Ukrayna Prezidenti Zelenski sənədlərin ABŞ tərəfindən imzalanmağa hazır olduğunu açıqlayıb. Davos sammiti çərçivəsində həmçinin Kiev və Vaşinqton arasında 800 milyard dollar dəyərində iqtisadi sazişin imzalanması planlaşdırılır ki, bu da Ukraynanın müharibədən sonrakı bərpasını əhatə edir.
Poliqon.info
