Prezident İlham Əliyev Bakı şəhəri və Abşeron yarımadasında su təchizatı, tullantı və yağış suları sistemlərinin təkmilləşdirilməsinə dair 2026-2035-ci illər üzrə Dövlət Proqramına həsr olunan müşavirədə çıxışında qeyd edib ki, Bakının və Abşeron yarımadasının içməli su problemləri əfsuslar olsun ki, uzun illər ciddi problem kimi durur. 2026–2035-ci illəri əhatə edən Dövlət Proqramı çərçivəsində içməli su mənbələrinin şaxələndirilməsi, magistral və paylayıcı xətlərin yenilənməsi, tullantı sularının təmizlənməsi qurğularının müasir standartlara uyğun qurulması, yağış sularının ayrı sistem üzrə idarə olunması prioritet istiqamətlər kimi müəyyən edilib.
Milli Məclisin deputatı Aydın Hüseynov Pravda.az-a açıqlamasında deyib ki, cənab Prezident İlham Əliyev Bakı, Abşeron, Sumqayıtda su problemlərinin aradan qaldırılması, yağış suları və s. məsələlərlə bağlı geniş müşavirə keçirib və 2026-2035-ci illəri əhatə edən mükəmməl layihənin təqdimatı göstərilib:
“Orada da qeyd edildiyi kimi birinci növbədə dəniz sularının duzsuzlaşdırılması, müasir texnologiyaların tətbiq edilməsi, sayğaclarla təmin olunması, sonrakı proseslərdə innovativ yanaşmanın tətbiqi istifadəni səmərəli edəcək. Digər tərəfdən Bakının 30 küçəsində yağış suları ilə bağlı müvafiq tədbirlər həyata keçiriləcək. İndiyə qədər 500 milyon kub metr su ehtiyatlarını özündə saxlaya biləcək çox sayda su anbarları var. Bu su anbarlarının sayı artırılacaq. Bunları həm öz daxili maliyyə hesablarımız hesabına keçirə bilərik, eyni zamanda xarici kredit götürmək şanslarımız da böyükdür. Çünki xarici borcumuz az olduğuna görə bir çox beynəlxalq maliyyə institutları Azərbaycana kreditlər təklif edir. Yəni maliyyə mənbələri məlumdur, bunlara çıxış asandır. Yeni su mənbəsi olan duzsuzlaşdırılma prosesinin aparılması, innovativ tədbirlərin həyata keçirilməsi, yeni kollektorların tətbiqi, Xəzər dənizinə axıdılan suların 100 faiz həcmində təmizlənməsi və bu kimi işlərin həyata keçirilməsi ölkənin su ilə təminatı problemlərini aradan qaldıracaq”.
Şəhanə Quliyeva
