Bakı, 14 yanvar, AZƏRTAC
2025-ci il qlobal miqyasda rekord səviyyədə üçüncü ən isti il olub.
AZƏRTAC xəbər verir ki, bu barədə Avropa Orta Mənzilli Hava Proqnozları Mərkəzinin Kopernik İqlim Dəyişiklikləri Xidməti və Kopernik Atmosfer Monitorinq Xidməti məlumat yayıb. Bildirilib ki, qlobal temperatur sənayeləşmədən əvvəlki səviyyələrdən (1850-1900) 1,47 °C (2,65 °F) yüksək olub.
2023-cü ildən 2025-ci ilə qədər orta temperatur sənayeləşmədən əvvəlki səviyyələrdən 1,5 °C fərqlənib və bu, Paris Sazişinin uzunmüddətli istiləşmə limitini aşan ilk üç illik dövr olub.
Antarktida və Arktikada da ən yüksək illik temperatur qeydə alınıb. Dəniz səthində də yüksək temperatur qeydə alınıb.
2025-ci ildəki həddindən artıq istiləşmə əsasən istixana qazlarının yığılması, davamlı emissiyalar və digər səbəblərlə əlaqədardır. Tropik temperaturlar 2023-2024-cü illərdən bir qədər aşağı olsa da, qütb bölgələrində rekord istilik müşahidə olunub.
