Londonda yerləşən məlumat analiz şirkəti "Benchmark Mineral Intelligence" 2025-ci ilə aid elektrikli avtomobil satış göstəricilərini açıqlayıb.
Marja.az xəbər verir ki, qlobal miqyasda elektrikli avtomobil satışları 2025-ci ildə illik müqayisədə 20% artaraq 20,7 milyon ədədə çatıb.
Çin bazarı liderdir
Ümumi satışların 12,9 milyon ədədi Çində qeydə alınıb. Ötən il Çin bazarında satışlar 2024-cü illə müqayisədə 17% artıb, lakin ilin son rübündə yavaşlama müşahidə olunub.
Çin bazarında 2025-ci il böyüməsinə daxili rəqabətin güclü olması, aqressiv qiymət siyasəti və artan avtomobil modelləri təsir edib.
Daxili rəqabət gücləndikcə, Çin istehsalçıları daha çox xarici bazarlara yönəliblər. Bu ixrac axını Cənubi Amerika, Cənub-Şərqi Asiya və Orta Asiya üçün faydalı olub və qlobal elektrikli avtomobil satışlarının artımına da təkan verib.
Çin markalarına məxsus elektrikli avtomobillər Avropa bazarında ötən ilki satışların 19%-ni təşkil edib.
Avropada 33% artım
Avropada elektrikli avtomobil satışları 2025-ci ildə illik müqayisədə 33% artıb.
Avropa elektrikli avtomobil bazarında 2025-ci il bir sıra qanuni dəyişikliklər ilə yadda qalıb, o cümlədən Avropa İttifaqının emissiya hədəflərinin yumşaldılması.
Ötən il Avropanın bir çox ölkəsində elektrikli avtomobil satışları artıb. Almaniya və İngiltərə kimi böyük bazarlarda satışlar müvafiq olaraq 48% və 27% artıb. Fransada isə ilin əvvəlində satışlar zəif başladığı üçün illik artım 2% olub.
ABŞ-da satışlar cüzi artıb, Kanada geriləyib
Şimali Amerikada (ABŞ, Kanada və Meksika) elektrikli avtomobil satışları 2025-ci ildə illik müqayisədə 4% azalaraq 1,8 milyon olub. ABŞ-da elektrikli avtomobillərə verilən vergi endirimlərinin 30 sentyabr 2025-ci il tarixində ləğv edilməsi və qoruyucu ticarət siyasəti satışların yalnız 1% artmasına imkan verib.
Dünyanın qalanında artım sürətlidir
Dünyanın digər bölgələrində elektrikli avtomobil satışları 2025-ci ildə illik müqayisədə 48% artaraq 1,7 milyon olub. Bu bazarlarda Çin markalarının artan iştirakı satış artımını dəstəkləyib.
