Aprelin 16-dək bloka üzv ölkələr Rusiyadan köhnə müqavilələr çərçivəsində barreli 47,6 dollara neft ala bilərlər.
Vətəninfo.az xəbər verir ki, Avropa İttifaqı Rusiya neftinin qiymət tavanını yenidən aşağı salıb. Bu , Rusiyanın üzv dövlətlərə xam neftini sata biləcəyi maksimum qiymətdir. Qərar Aİ-nin Rəsmi Jurnalında dərc olunub .
Sənədə əsasən, Rusiyanın 2026-cı il yanvarın 31-dək Avropa Birliyinə neftin barrelini 47,6 dollardan yuxarı qiymətə satması qadağandır. Bundan sonra qiymətin fevralın 1-də barrelini 44,1 dollara qədər düşməsi gözlənilir.
Qeyd olunur ki, keçid dövrü 16 aprel 2026-cı ilə qədər qüvvədədir və bu, bloka üzv ölkələrə 1 fevral 2026-cı il tarixindən əvvəl bağlanmış müqavilə çərçivəsində Rusiya nefti üçün hər barel üçün 47,6 dollara qədər ödəniş etməyə imkan verir.
Rusiya neftinə qiymət məhdudiyyətinin tətbiq edilməsi ehtimalı ilk dəfə Rusiyanın Ukraynaya tammiqyaslı müdaxiləsinin ilk ilində müzakirə olunub. Medianın məlumatına görə, 2022-ci ilin noyabr ayının sonlarında Aİ Rusiya neftinə qiymət məhdudiyyətinin bir barel üçün 65-70 dollar arasında tətbiq edilməsini müzakirə edib. Həmin ilin dekabr ayında Aİ Şurası Rusiya neftinə qiymət məhdudiyyətinin bir barel üçün 60 dollar səviyyəsində tətbiq edilməsinə razılıq verib.
3 sentyabr 2025-ci ildə Avropa Birliyi Rusiya neftinin qiymət tavanını bir barel üçün 60 dollardan 47,6 dollara endirdi. Eyni zamanda, avropalılar bunu “dinamik” hala gətirdilər və aşağı və ya yuxarı düzəlişlərə imkan verdilər.
