Rusiyanın keçmiş nazir müavini evində ölü tapılıb.
İnterpress.az xəbər verir ki, bu barədə Rusiya mətbuatı məlumat yayıb.
Rusiyanın Əmək və Sosial Müdafiə nazirinin keçmiş müavini Aleksey Sklyar Moskvadakı fərdi yaşayış evində ölü tapılıb. İlkin ehtimallara görə, sabiq məmur intihar edib.
Məlumata görə, onun evinin qapısı açıq olub, meyiti isə astanada aşkarlanıb. Hazırda müstəntiqlər hadisə yerində işləyir və ölümün təfərrüatlarını araşdırırlar.
Aleksey Sklyar ölümündən əvvəl yaxınlarına məktub göndərib. Bazanın sözlərinə görə, o, bunda həyat yoldaşını günahlandırıb.
Keçmiş məmur ölümündən əvvəl Telegram-da dostlarına mesaj göndərib:
“Mən artıq ölmüş olduğum halda, siz mənim məktubumu oxuyursunuz. Hər şeydə həyat yoldaşım günahkardır”.
Xilasedicilər Sklyarın evinə göndərilib, lakin onlar gələnə qədər o, artıq ölüb.
Mərhum keçmiş nazir müavininin həyat yoldaşı Yuliya ağır emosional stress vəziyyətində olduğundan nəşrin suallarını cavablandırmaqdan imtina edib.
Sklyarın ətrafı bildirib ki, cütlük bir neçə ildir ki, qısqanclıq üzündən münaqişələr və mübahisələr yaşayır.
Qeyd edək ki, Aleksey Sklyar 2018-2022-ci illərdə Rusiyanın əmək və sosial müdafiə nazirinin müavini vəzifəsində çalışıb.
Xuraman Etibarlı
İnterpress.az
