Azərbaycan dili siniflərinə övladlarını qeydiyyatdan keçirən valideynlər də xoşbəxtdirlər: "Uşaqlarımız bu məktəbdə ana dilimizi sevərək öyrənirlər. Tariximiz, mədəniyyətimiz haqqında bilgilər əldə edir, adət-ənənəmizə yiyələnirlər. Tarixi günlərdə, milli bayramlarda burada müxtəlif tədbirlər keçirilir. Övladlarımız öz aralarında Azərbaycan dilində danışır, milli ruhda böyüyürlər. Biz Azərbaycandan uzaqda yaşasaq da, burada bir Azərbaycan yaşadırıq".
- Yeganə xanım, bir neçə il əvvəl Bakıda redaksiyamızda qonaq olarkən, "Bir gün Torontoda görüşərik" demişdim. Qismət oldu, rəhbərlik etdiyiniz məktəbin fəaliyyəti ilə Torontoda tanış olmaq imkanı yarandı…
- Kanadaya gəldiyim ilk illərdən burada adi məktəblər də, xarici dillər sinifləri də var. Kanada çoxmillətli ölkə olduğu üçün burada müxtəlif dillərdə dərslər tədris olunur ki, həmin dillərdən biri də Azərbaycan dilidir. Yaratdığımız məktəbin gələn il 20 yaşı tamam olur. Bu məktəbi yaradanda maneələr vardı. Həmişə də məktəbimiz uğrunda mübarizə aparırıq. Bu yay dilimiz siyahıdan çıxarılmışdı. Valideynlər yay dərsləri üçün uşaqlarını qeydiyyatdan keçirməkdən ötrü axtaranda tapa bilmirdilər. Dərhal müraciət elədik. "Səhv olub" dedilər. Kanadada hər bir xalq öz adət-ənənəsini və dilini qoruyub saxlayır. Biz də bunun uğrunda çalışırıq.
- Məktəbin hazırkı fəaliyyəti necədir?
- Məktəb sentyabrın 20-dən sonra fəaliyyətə başlayıb. Hər altıncı gün dərsimiz keçirilir. Artıq 50-ə yaxın şagirdimiz var. Bir sinfin açılması üçün 25 şagird olmalıdır. Hazırda iki sinfimiz fəaliyyət göstərir. Müraciətlər çox olduğundan, üçüncü sinfimizi açmaq üzərində düşünürük. Məktəbdə oxumaq istəyən uşaqlar hər il qeydiyyatdan keçməlidirlər. Çünki dərslər Toronto Şəhər Təhsil Mərkəzinin məktəblərində keçirilir. Azərbaycan dili rəsmi olaraq mərkəzin Xarici dillər bölməsində tədris olunur. Bunun üçün uşaq məktəbə hazırlığa getməlidir. Məktəbəhazırlığa gedən uşaq bizim sinfə yazıla bilir. 1-8-ci sinif şagirdləri bu siniflərdə oxuyurlar. Üçüncü sinfə qədər Gülnar Nəsirovanın, 3-dən 8-ci sinfə qədər mənim sinfimdə oxuyurlar. Uşaqlara sırf Azərbaycan dili tədris olunur. Bununla yanaşı, mədəniyyətimizi, tariximizi, adət-ənənələrimizi də öyrədirik. Yuxarı siniflərdə oxuyanlar Azərbaycan, Qarabağ haqqında layihələr hazırlayırlar. Onlar təhsil aldıqları məktəblərdə də bu layihələri nümayiş etdirirlər. Uşaqları dil səviyyələrinə görə bölürük. Elə uşaq var ki, səkkizinci sinifdə oxuyur, amma dili bilmir. Onun üçün sıfırdan başlamalısan. Uşaqların əksəriyyəti Kanadada doğulub. Onlar Azərbaycanın dilini, atributlarını, bu gününü, tarixini bu məktəbdə öyrənirlər. Bakıdan gələndə Azərbaycanın xəritəsini gətirmişəm. Uşaqlar hansı rayonun harada yerləşdiyini artıq bilirlər. Qarabağ haqqında məlumatlıdırlar. Məqsədimiz odur ki, uşaqlar dilimizi, adət-ənənələrimizi yaşatsınlar, öz millətimizdən özlərinə dost seçsinlər, xoşagəlməz çevrəyə düşməsinlər. Müəllimlərimizdən Mikayıl Bəylər, Qəmər Peyğəmbəri, Ramin Şadrup da uşaqlarla ürəklə məşğul olurlar.
- Valideynlər uşaqlarını məktəbə yazdırmağa maraqlıdırlarmı?
- Biz yayda dərsimiz olmayanda da bir yerə yığışırıq. Valideynlər bir-birləri ilə ünsiyyət qururlar. Uşaq öz dilində danışmırsa, öz mənsub olduğu mühitdə böyümürsə, bu, balaca balığın okeanda böyük balıqlara yem olması kimidir. Sonra uşaq başqa səmtlərə yönəlir. Çünki o, öz söy-kökündən kənarda qalır, dilimizi unudur. Azərbaycana gedəndə uşaq getmək istəmir, mən o dili, mədəniyyəti bilmirəm deyir. Biz valideynlərlə bir yerdə olanda bir-birimizlə mənəvi bağ qururuq. Valideyndən də çox şey asılıdır. Mən həmişə deyirəm ki, lap 15 sinif də aça bilərik, təki valideynlər istəsinlər.
- Uşaqlara əsasən hansı məşğələlər keçirilir?
- Məktəbdəki dərsdən sonra icmaya gəlirik. Burada tamaşalar səhnələşdirilir, milli rəqslər, mahnı və şeirlər öyrədilir, gitara dərsləri keçilir. Keçən il Məhəmməd Füzulinin "Meyvələrin söhbəti"ni səhnələşdirdik. Başqa ölkələr də bizi dəvət edir. Yayda Şimali Makedoniyaya dəvət almışdıq. Türk uşaq festivallarında iştirak edirik. Hər il festivalda Azərbaycan çadırı qurur, öz ölkəmizin mədəniyyətini, tarixini nümayiş etdiririk. Biz uşaqlara "Bizim davamçılarımız olacaqsınız" deyəndə sevinirlər.
- Məktəbin fəaliyyətinə Toronto Təhsil Mərkəzinin dəstəyi varmı?
- Mərkəzin rəsmi saytında xarici dillər bölməsində "Azərbaycan dili" əlavə olunub. Pandemiya dövründə Azərbaycan əlifbasını məktəbə daxil etdirdik. Əgər Xocalı soyqırımı günü şənbə gününə düşərsə, uşaqlar da, müəllimlər də məktəbə gəlmirlər.
- Dərslikləri necə əldə edirsiniz?
- Azərbaycan dili ilə bağlı dərslikləri Azərbaycandan gətirirəm. Dərslikləri kitabxanalara da mən vermişəm. Şagirdlərə təhsil mərkəzi tərəfindən dərs ləvazimatları da verilir. Bakıda olarkən dərsliklərlə bağlı dəfələrlə təhsil idarəsinə, Diasporla İş üzrə Dövlət Komitəsinə də müraciət etmişik. Amma komitədən bizə bildirildi ki, sinfi onlar açmadığından kömək edə bilməyəcəklər.
