Almaniya Silahlı Qüvvələrinin kəşfiyyat qrupu bu gün Qrenlandiyanı tərk edəcək. Geri çəkilmə qərarı, ABŞ Prezidenti Donald Trampın Qrenlandiya ilə bağlı təhdid dolu açıqlamaları və bölgədə “milli təhlükəsizlik” məsələsinə vurğu etməsi fonunda verilib.
Vətəninfo.az xəbər verir ki, Almaniyanın DPA xəbər agentliyinə danışan hərbi rəsmi bildirib ki, 15 əsgər mülki təyyarə ilə Kopenhagenə yola düşəcək. Rəsmi əlavə edib ki, qrup öz missiyasını başa vurub və kəşfiyyat nəticələri yaxın günlərdə qiymətləndiriləcək.
Almaniya Müdafiə Nazirliyi daha əvvəl açıqlamışdı ki, Danimarkanın dəvəti ilə 15-17 yanvar tarixlərində digər Avropa ölkələri ilə birgə Qrenlandiyada kəşfiyyat işlərində iştirak edəcəklər. Alman komandası 16 yanvar Cümə günü hərbi təlimlər üçün şəraiti araşdırmaq məqsədilə Qrenlandiyanın Nuuk şəhərinə səfər etmişdi.
Trampın açıqlamaları və gərginlik
Donald Tramp ABŞ-ın “milli təhlükəsizlik məqsədilə Qrenlandiyaya ehtiyacı olduğunu” və bunun “inşa edilən Qızıl Günbəz üçün həyati əhəmiyyət kəsb etdiyini” bildirib.
Danimarkanın muxtar bölgəsi olan Qrenlandiya əvvəllər ABŞ-dan gələn suverenliyin təhvil verilməsi tələblərini rədd etmişdi. Son dövrlərdə isə Danimarka müttəfiqlərə bölgədə hərbi əməkdaşlığı artırmaq çağırışı edib. Bu çərçivədə Avropa ölkələri Qrenlandiyaya kiçik hərbi birliklər və zabitlər göndərəcəklərini açıqlayıblar.
ABŞ prezidenti Tramp, Qrenlandiya ilə bağlı mübahisələrdə dünya sülhünün təhlükədə olduğunu iddia edərək, ABŞ-ın Qrenlandiyanı ələ keçirməsinə qarşı çıxan səkkiz Avropa ölkəsinə gömrük rüsumları tətbiq edəcəyini bildirmişdi. Səkkiz Avropa ölkəsi isə birgə bəyanat yayıb və bu qərara etirazlarını ifadə ediblər.
