Müasir həyatın sürətli tempi stresin gündəlik həyatın ayrılmaz hissəsinə çevrilməsinə səbəb olub.
Pravda.az bildirir ki, uzunmüddətli stres həm psixoloji, həm də fiziki sağlamlığa mənfi təsir göstərir.
Mütəxəssislərin fikrincə, streslə mübarizədə ilk addım onun mənbəyini düzgün müəyyən etməkdir. Gündəlik həyatda dərin nəfəs məşqləri, müntəzəm fiziki aktivlik və keyfiyyətli yuxu stres səviyyəsinin azalmasına kömək edir. Balanslı qidalanma və istirahətə vaxt ayırmaq da vacib amillər sırasındadır.
Bundan əlavə, yaxın insanlarla ünsiyyət qurmaq, hiss və düşüncələri bölüşmək emosional rahatlıq yaradır. Zamanın düzgün planlaşdırılması, meditasiya, musiqi dinləmək və sevilən hobbilərlə məşğul olmaq stresin idarə olunmasında təsirli üsullar hesab olunur.
Mütəxəssislər vurğulayır ki, stresi görməzdən gəlmək əvəzinə onu idarə etməyi öyrənmək və gündəlik həyat tərzinə uyğun vərdişlər formalaşdırmaq daha sağlam və balanslı həyat üçün vacibdir.
Əminə Bayramova
