20 Yanvarın hüznlü, lakin qürurverici xatirəsi bu dəfə Bakı şəhərində yerləşən 333 nömrəli tam orta məktəbin divarları arasında yad edildi. Keçmişin ağrısı ilə bu günün qürurunu bir araya gətirən anım tədbiri, eyni zamanda Vətən Müharibəsi qəhrəmanlarının şücaətinə işıq saldı.
Tədbir məktəbin 3 “B” sinfinin təşəbbüsü ilə reallaşdı. Sinif rəhbəri Günel Əsgərova və təlim-tərbiyə işləri üzrə direktor müavini Mətanət Hüseynova bu mənəvi yükü daşıyan tədbirin təşkilində xüsusi rol oynadılar. Açılış nitqində Mətanət Hüseynova vurğuladı ki, 20 Yanvar yalnız tarix deyil, xalqın vicdan yaddaşıdır.
Zalda səslənən Azərbaycan Respublikasının Dövlət Himni və ardınca gələn bir dəqiqəlik sükut hər kəsi eyni duyğuda birləşdirdi. O sükutda həm şəhidlərin ruhu, həm də gələcəyin məsuliyyəti hiss olunurdu.
Anım gecəsində Qazi Elçin Əsədovun Vətən Müharibəsində keçdiyi döyüş yolu xatırladıldı. Onun Füzuli və Xocavənd istiqamətlərində apardığı döyüşlər, eləcə də “Cəsur döyüşçü” medalı ilə qiymətləndirilən fədakarlığı şagirdlər üçün kitabdan oxunan deyil, həyatdan gələn canlı bir dərs idi.
Çıxış edən polkovnik-leytenant Xəqani Abbasov 20 Yanvar faciəsinin xalqımızın azadlıq iradəsini sındıra bilmədiyini, əksinə, bu iradəni daha da gücləndirdiyini qeyd etdi.
Eyni zamanda ehtiyatda olan baş leytenant Qasımov Qasım döyüş meydanında yaşadığı təcrübələri şagirdlərlə bölüşərək, xalqımızın birlik və əzmi sayəsində hər zaman güclü və yenilməz olduğunu vurğuladı.
Tədbirdə iştirak edən Azərbaycan Qan Donorluğunun İnkişafı Mərkəzinin idarə heyətinin sədri Fuad Rəsul və Mərkəzin icraçı direktoru Kamil Hüseynov çıxışlarında şəhidlərimizin qanı ilə yazılan tarixin bu gün humanitar dəyərlərlə – insan həyatını xilas etməklə davam etdiyini bildirdilər.
Şagirdlərin səsləndirdiyi şeirlər və təqdim etdikləri bədii kompozisiyalar tədbiri daha da təsirli etdi. O gün məktəbdə dərs zəngi yox idi — orada yaddaş danışırdı.
Tədbir şəhidlərin əziz xatirəsinə dərin ehtiram və gələcəyə ünvanlanan məsuliyyət hissi ilə başa çatdı.
