Ukraynanın ən iri mobil rabitə operatoru olan “Kyivstar” şirkətinin baza stansiyalarının 40–60 faizi elektrik enerjisi ilə təmin olunmur. Vətəninfo.az xəbər verir ki, bu barədə şirkətin prezidenti Aleksandr Komarov məlumat verib.
Komarov Davosda keçirilən Dünya İqtisadi Forumu çərçivəsində bildirib ki, elektrik təchizatı ilə bağlı problemlər səbəbindən ölkənin doqquz bölgəsində operatorun infrastrukturu ciddi zərər görüb. Onun sözlərinə görə, hazırda 1000-dən çox baza stansiyası faktiki olaraq fəaliyyət göstərmir.
“Daxili təsnifatımıza əsasən, bəzi bölgələrdə vəziyyət tam elektrik kəsintisi səviyyəsindədir”, – deyə Komarovun sözlərini Strana nəşri sitat gətirib.
Qeyd olunur ki, bundan əvvəl Kiyev sakinləri “Kyivstar” şəbəkəsində mobil internetin zəifliyi ilə bağlı şikayətlər ediblər.
Ukraynada enerji sektorunda fövqəladə vəziyyət elan edilib. Ölkənin bütün bölgələrində istehsal və paylama infrastrukturuna genişmiqyaslı ziyan dəyməsi səbəbindən gündəlik bir neçə saat davam edən elektrik kəsintiləri tətbiq olunur. Elektrik şəbəkəsinin həddindən artıq yüklənməsi zamanı balansı qorumaq üçün təcili və müddətsiz kəsintilər həyata keçirilir.
Bu vəziyyət nəticəsində bir sıra supermarketlər, kafe və restoranlar fəaliyyətini dayandırıb, bəzi bölgələrdə məktəblər tətil müddətini uzadıb və ya distant təhsilə keçib. Rəsmi məlumatlara görə, ən ağır vəziyyət Kiyevdə, eləcə də ölkənin şimal, şərq və cənub-şərq bölgələrində müşahidə olunur.
