ABŞ prezidenti müttəfiqlərlə bağlı sərt mövqe ortaya qoyub...
Poliqon xəbər verir ki, ABŞ prezidenti Donald Tramp Davosdakı çıxışında Avropa ilə bağlı kəskin və tənqidi açıqlamalar verib. Onun sözlərinə görə, Avropa ölkələri son 100 il ərzində formalaşdırdıqları siyasi və ictimai mədəniyyətdən imtina etməlidirlər. Tramp bildirib ki, ABŞ zəif deyil, güclü və məsuliyyətli müttəfiqlərə ehtiyac duyur.
ABŞ prezidenti həmçinin çıxışında vurğulayıb ki, son on il ərzində Avropa strateji baxımdan ciddi problemlərlə üzləşən bir qitəyə çevrilib. Onun fikrincə, təhlükəsizlik, iqtisadi sabitlik və qlobal proseslərdə fəallıq baxımından Avropa əvvəlki rolunu itirib və bu vəziyyət ABŞ üçün əlavə risklər yaradır. Tramp hesab edir ki, müttəfiqlər öz müdafiə imkanlarını gücləndirməli, daha müstəqil və çevik siyasət yürütməlidirlər.
Donald Trampın bu açıqlamaları Vaşinqtonun Avropa ilə münasibətlərdə daha sərt və tələbkar xətt tutduğunu göstərir. Analitiklər qeyd edirlər ki, bu cür bəyanatlar ABŞ–Avropa münasibətlərində yeni gərginlik mərhələsinin başlanğıcı kimi dəyərləndirilə bilər.
Poliqon.info
