Göllər müxtəlif üsullarla və müxtəlif növ tullantılar hesabına qurudulur, onların yerində isə yeni fərdi yaşayış evləri və tikililər inşa edilir. Son illər Bakı şəhərində və Abşeron yarımadasında bu cür halların geniş vüsət aldığı müşahidə olunur.
Belə ərazilərdən biri də Abşeron rayonu, Məmmədli kəndində yerləşən Məmmədli gölüdür. Son illərdə gölün ərazisinin xeyli kiçildiyi diqqət çəkir. Onun qurudulması və yerində yeni fərdi yaşayış evlərinin tikilməsi ilə bağlı iddialar səsləndirilir.
"Qanunsuz olaraq torpaq, daş və hər cür zir-zibil gətirib buraya tökürlər. Məqsədləri ərazini qurutmaqdır. Bu barədə dəfələrlə yerli icra nümayəndəsinə və bələdiyyəyə müraciət etmişik. Deyirlər ki, xəbərləri yoxdur. Halbuki onların xəbəri olmadan bu işlərin görülməsi mümkün deyil. İcazə alaraq tullantıları gətirib tökürlər. Gölləri qurudurlar, sonra isə həmin sahələri satırlar. Yerində evlər tikilir - altı su, üstü quru", - deyə sakinlərdən biri bildirib.
Mütəxəssislər bildirirlər ki, bu cür hallar yolverilməzdir və gələcəkdə ciddi fəsadlara səbəb ola bilər.
Daşınmaz əmlak üzrə ekspert Elnur Fərzəliyevin sözlərinə görə, vətəndaş fərdi yaşayış evi alarkən mütləq şəkildə həmin ərazinin torpaq tarixini araşdırmalıdır:
"Əgər ərazi vaxtilə gölməçə və ya qamışlıq sahə olubsa, zaman keçdikcə həmin tikililərin deformasiyaya uğraması qaçılmazdır".
