ain.az, Demokrat.az saytından verilən məlumata əsaslanaraq xəbər yayır.
Bakının Xəzər rayonunda 1981-ci il təvəllüdlü Rövşən dayısı Əzizə xəsarət yetirib. Demokrat.az-ın əldə etdiyi məlumata görə, hadisə ötən ilin fevralın 18-də rayonun Buzovna qəsəbəsi Albalılıq yeni yaşayış massivində baş verib. Rövşən həmin gün saat 15 radələrində Albalılıq yeni yaşayış massivi ərazisində yerləşən “Köhnə yeməkxana” adlandırılan kafedə spirtli içki qəbul etdiyi zaman dayısı Əziz həmin kafeyə daxil olub və masaların birində əyləşərək özünə çay sifariş verib.Daha sonra Əziz bacısı oğlu Rövşən dayısı ilə mübahisə edib. Buna səbəb Rövşənin dayısına ev tikdirmək üçün gətirdiyi mişar daşlarının əskik olması ilə bağlı olub. Kafedə Əziz bacısı oğluna nalayiq ifadələr işlədərək onu təhqir edib. Bu zaman Rövşən dayısını itələyərək yerə yıxıb və təpiklə sağ bud-çanaq nahiyyəsinə vurub. Hadisəni törədən Rövşənin barəsində Cinayət Məcəlləsinin 221.1-ci (xuliqanlıq, yəni ictimai qaydanı kobud surətdə pozan, cəmiyyətə açıqca hörmətsizlik ifadə edən, şəxslər üzərində zor tətbiq olunması ilə və ya belə zorun tətbiq edilməsi hədəsi ilə, habelə özgənin əmlakının məhv edilməsi, yaxud zədələnməsi ilə müşayiət edilən qərəzli hərəkətlər) maddəsi ilə ittiham elan edilib. İş üzrə ifadə verən Rövşən ona elan olunmuş ittiham üzrə özünü qismən təqsirli bilib. O, ifadəsində göstərib ki, Lerik rayonunda qeydiyyatda olmaqla Xəzər rayonu, Buzovna qəsəbəsi, Albalılıq yeni yaşayış massivi, nömrəsiz fərdi evdə ailəsi ilə birlikdə yaşayır: “Özümə məxsus “Zil” markalı yük avtomobili ilə mişar daşı satışı ilə məşğul oluram. Əziz mənim dayımdır. Son vaxtlar aramızda münasibət pozuldu. Dayım mənə daş sifariş verib. Daşı apararaq onun həyətində boşaltdıqdan sonra dayım bildirdi ki, guya daşların sayı əskik gəlir. Dayıma bildirdim ki, daşların sayında heç bir əskiklik ola bilməz. Elə bu söhbətdə aramızda sözlə mübahisə oldu və dayım məni təhqir etdi. Lakin yaşlı olduğuna görə ona bir söz demədim”. Təqsirləndirilən şəxs qeyd edib ki, Albalılıq yeni yaşayış massivində yerləşən hamının “Köhnə yeməkxana” kimi tanıdığı kafedə pivə içirərkən dayısı Əziz ora gəlib və onun oturduğu masaya yaxın bir masada əyləşərək özünə çay sifariş verib: “Kafeni işlədən Ulduz adlı şəxs ona çay verdi. Özüm həmin vaxt sərxoş olmuşam. Dayımı görəndə əvvəlki gün aramızda etdiyimiz mübahisə yadıma düşdü. Yenə də əsəbləşdim, dözməyərək ona yaxınlaşaraq dedim ki, yaşlı adamsan, sənin mənə qarşı elədiyin hərəkəti kimə deyirəmsə, hamı səni söyür, ona görə də heç kimlə işin olmasın. Bunu deyən kimi dayım valideynlərimə qarşı nalayiq ifadə işlətdi. Bu zaman sərxoş halda daha da əsəbləşdim. Əlim ilə onun sinəsindən itələdi, o, masaya dəydi. Bunu görən kafeni işlədən Ulduz adlı şəxs və kafedə olan müştərilər yaxınlaşaraq bizi ayırdılar. Bundan sonra evinə getdim”.Xəzər Rayon Məhkəməsinin hökmü ilə Rövşən 8 ay 26 gün müddətə azadlığın məhdudlaşdırılması cəzası alıb. Təqsirləndirilən şəxsə cəzaçəkmə müddəti ərzində Buzovna qəsəbəsi, Albalılıq yeni yaşayış massivi, nömrəsiz fərdi evi axşam hər gün axşam saat 23:00-dan növbəti gün səhər saat 07:00-dək tərk etməsi, həmçinin Bakı şəhərinin ərazi hüdudlarını tərk etməsi qadağan olunub.Bundan başqa, onun üzərinə elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün ona xidmət etmək, məhkəmə qərarı olmadan yaşayış yerini dəyişdirməmək, cəzanın icrasına nəzarət edən orqanı iş və ya təhsil yerinin dəyişdirilməsi barədə əvvəlcədən məlumatlandırmaq tapşırılıb.Bundan əlavə cəzaçəkmə dövründə Rövşənin kütləvi tədbirlərdə iştirak etməsi qadağan olunub.Fariz Məlikli
Demokrat.az
Ən son xəbərləri və yenilikləri almaq üçün ain.az saytını izləyin.
