Bakı, 23 yanvar, Tamilla Məmmədova, AZƏRTAC
Azərbaycan Tacikistan üçün tranzit və logistika mərkəzi kimi xüsusi əhəmiyyətə malikdir.
Bu barədə AZƏRTAC-ın saytında yayımlanan “Azərbaycan və Dünya” verilişinin son bölümündə beynəlxalq münasibətlər və geosiyasət üzrə tacik eksperti Güzel Maitdinova bildirib.
O, Əfqanıstandakı siyasi qeyri-müəyyənlik və cənub ticarət yollarına məhdud çıxış nəzərə alınmaqla, Cənubi Qafqazın rolunun əhəmiyyətli dərəcədə artdığını vurğulayıb.
Ekspertin sözlərinə görə, Tacikistan Azərbaycan vasitəsilə Qərbi Asiya, Aralıq dənizi hövzəsi və Avropa bazarlarına çıxış əldə edir. Maitdinova əlavə edib ki, bu amil Düşənbədə yüksək qiymətləndirilir, həmçinin tranzit tərəfdaşlığı ikitərəfli əməkdaşlığın daha da möhkəmləndirilməsi üçün zəmin yaradır.
