Vaşinqtonun mümkün təcavüzü onun üçün baha başa gələ bilər, Havana isə ərazi bütövlüyünü qorumağa hazırdır...
Poliqon xəbər verir ki, Kuba prezidenti, Milli Müdafiə Şurasının sədri Migel Dias-Kanel Bermudes hərbi təlimlər zamanı çıxış edərək ABŞ-nin Kubaya qarşı mümkün hərbi təcavüzünün Vaşinqton üçün ciddi nəticələr doğuracağını bəyan edib. Onun sözlərinə görə, Havana ölkənin ərazi bütövlüyünü və suverenliyini qorumaq üçün bütün zəruri tədbirləri görməyə hazırdır.
Dias-Kanel vurğulayıb ki, təcavüzün qarşısını almağın ən effektiv yolu potensial hücumun qarşı tərəf üçün hansı “qiymətə” başa gələcəyini aydın şəkildə göstərməkdir. “Aqressiyadan yayınmağın ən yaxşı forması imperializmin ölkəmizə hücumun ona hansı bədəllə başa gələcəyini əvvəlcədən hesablamalı olmasıdır və bu, birbaşa olaraq bizim bu cür hərbi fəaliyyətlərə hazırlıq səviyyəmizlə bağlıdır”, – deyə Kuba lideri təlim iştirakçıları ilə görüşü zamanı bildirib. Onun çıxışı Caribe telekanalı tərəfindən yayımlanıb.
Məlumata görə, Dias-Kanel şənbə günü Milli Müdafiə Günü münasibətilə keçirilən tədbirlər çərçivəsində tank hissələrindən birinə baş çəkib. O, burada müxtəlif növ silahların tətbiqi ilə keçirilən taktiki təlimləri, eləcə də bölmələrin şərti düşmənə qarşı döyüş şəraitində qarşılıqlı fəaliyyətini izləyib. Kuba rəhbərliyi bu cür təlimlərin ölkənin müdafiə qabiliyyətinin gücləndirilməsi və mümkün təhlükələrə hazırlığın artırılması baxımından mühüm əhəmiyyət daşıdığını bildirib.
Poliqon.info
