Suriyadakı Qamışlı hava limanında yerləşən Rusiya qoşunlarının döyüş təyyarələri, helikopterləri və hərbi texnikası ilə birlikdə tədricən geri çəkilməyə başladığı bildirilir.
Turkustan.az xəbər verir ki, yerli mənbələrə görə, Rusiyanın İlyuşin hərbi nəqliyyat təyyarələri qoşunları Latakiyadakı Hmeymim hava bazasına daşıyır.
Mənbələr Rusiya qüvvələrinin bölgədən tamamilə geri çəkilib-çəkilməyəcəyi ilə bağlı qeyri-müəyyənliyin olduğunu bildirir. Bəzi məlumatlara görə, bəzi qoşunlar hələ də Qamışlıdadır, hava hücumundan müdafiə sistemləri və bəzi qırıcı təyyarələr ərazidə yerləşdirilib.
Geri çəkilmə xəbəri Bəşər Əsəddən sonra Suriyada nəzarətin dəyişməsi və bölgədəki yeni siyasi və militarist tarazlıqlarla əlaqələndirilir. Bildirilir ki, Rusiya qoşunları Suriyanın müvəqqəti hökuməti ilə kürdlərin rəhbərlik etdiyi Suriya Demokratik Qüvvələri (SDF) arasında əldə edilən atəşkəsdən sonra mövqelərini yenidən qiymətləndirir.
Rusiya hərbi qüvvələrinin yenidən yerləşdirilməsi və ya tamamilə çıxarılması ilə bağlı Moskvadan heç bir rəsmi açıqlama verilməyib. Bununla belə, daşınan texnika və qoşunların müharibənin davam etdiyi şimal-şərqi Suriyada nəzarət və təhlükəsizlik dinamikasına təsir edəcəyi ehtimal edilir.
Qamışlı Hava Limanı Suriyanın Türkiyə ilə sərhədinə yaxın strateji bir nöqtədə yerləşir. Rusiya üçün uzun müddətdir Suriyadakı hərbi mövcudluğunun bir hissəsi olan bu bazanın gələcəyi geosiyasi mübarizələr və regiondakı güc balansı baxımından kritik hesab olunur.
Aytən Yaşar/ Turkustan.az
