Yeni məhdudiyyətlər enerji gəlirlərini azaltmağa və “kölgə donanmasını” neytrallaşdırmağa yönəlib…
Avropa İttifaqı Rusiyaya qarşı 20-ci sanksiya paketinin hazırlanması üzərində işləyir. Məqsəd Rusiyanın enerji sektorundan əldə etdiyi gəlirləri məhdudlaşdırmaq, “kölgə donanmasını” neytrallaşdırmaq və sanksiyalardan yayınma mexanizmlərini bağlamaqdır.
Poliqon xəbər verir ki, bu barədə Almaniyanın federal xarici işlər naziri İohann Vadeful Latviyanın xarici işlər naziri Bayba Braje ilə Riqada keçirdiyi birgə mətbuat konfransında bildirib.
Nazirin sözlərinə görə, yeni sanksiyalar Rusiyanın dənizdə, havada və kiberməkanda özünü göstərən hibrid təhdidlərinə qarşı yönələcək, eyni zamanda Avropanın kritik infrastrukturunun müdafiəsini gücləndirməlidir. O vurğulayıb ki, Avropa İttifaqı Moskvanın hesab etdiyindən daha güclü və dayanıqlıdır və buna görə də yeni sanksiya paketi üzərində tam güclə işləyir.
İohann Vadeful xüsusilə Rusiyanın “kölgə donanmasını” ciddi təhlükə adlandırıb. Onun sözlərinə görə, sanksiyalardan yan keçən bu gəmilər təkcə aqressora əlavə gəlir gətirmir, həm də Baltik dənizi sahilləri üçün real risk yaradır. Nazir qeyd edib ki, bu gəmilərin bir qismi texniki cəhətdən yararsız vəziyyətdədir, ekipajları isə kifayət qədər hazırlıqlı deyil. Belə tankerlərdən birinin qəzaya uğraması Baltik dənizi sahillərində ciddi çirklənməyə, nəticə etibarilə isə turizm sektoruna ağır iqtisadi zərbə vuracaq ekoloji fəlakətə səbəb ola bilər.
Bu təhdidlərin qarşısını almaq üçün Avropa İttifaqı belə gəmilərə nəzarəti gücləndirməyi, dəniz hüququnun imkanlarından daha fəal istifadə etməyi və beynəlxalq əməkdaşlığı genişləndirməyi planlaşdırır. Baltik regionu ölkələrinin “kölgə donanmasının” fəaliyyəti və qaydaları pozan gəmilərin sahibləri barədə məlumat mübadiləsini artıracağı bildirilir.
Nazir əlavə edib ki, statusu və bayrağı qeyri-müəyyən olan gəmilərə qarşı da tədbirlər görüləcək və bunun üçün beynəlxalq dəniz hüququnun verdiyi bütün imkanlardan istifadə olunmalıdır. Onun fikrincə, bu addımlar Rusiyanın sanksiyalardan yayınma imkanlarını ciddi şəkildə məhdudlaşdıracaq.
Poliqon.info
