BAKI, TurkicWorld
Səudiyyə Ərəbistanı rəhbərliyi paytaxt Riyadın yeni simvolu kimi təqdim edilən nəhəng “Mukaab” göydələni layihəsini qeyri-müəyyən müddətə dondurub.
TurkicWorld xəbər verir ki, kub formalı və ölçülərinə görə “dünyanın ən böyük binası” kimi planlaşdırılan “Mukaab” layihəsinin maliyyə tutumu və iqtisadi səmərəliliyi yenidən qiymətləndirilir. Mənbələrin məlumatına görə, layihənin icrası Səudiyyə Ərəbistanının investisiya prioritetlərinə yenidən baxması fonunda dayandırılıb.
Bildirilir ki, 925 milyard dollarlıq aktivləri idarə edən Səudiyyə Ərəbistanı Suveren Sərvət Fondu xərclərə nəzarəti gücləndirərək ambisiyaları mərhələli şəkildə azaltmağa başlayıb. Bu addım Vəliəhd Şahzadə Məhəmməd bin Salmanın “Vision 2030” strategiyası çərçivəsində təxirə salınan və ya ixtisar edilən növbəti meqa-layihə kimi qiymətləndirilir.
Ekspertlərin fikrincə, neft qiymətlərinin bu cür nəhəng infrastruktur layihələrini maliyyələşdirmək üçün tələb olunan səviyyədən aşağı olması krallığı daha real və qısa müddətdə gəlir gətirən hədəflərə yönəldib. Hazırda əsas prioritetlər sırasında World Expo 2030 infrastrukturunun qurulması, FIFA 2034 Dünya Çempionatı hazırlıqları, 60 milyard dollarlıq Diriyə mədəniyyət layihəsi və Qiddiya turizm-əyləncə kompleksi yer alır.
Qeyd edək ki, dizaynına görə 400 metr hündürlüyə və 400 metr enə malik olması nəzərdə tutulan “Mukaab”ın daxilində dünyanın ən böyük süni intellektli ekranının və 300 metrlik spiralvari qüllənin yerləşdirilməsi planlaşdırılırdı. Layihə rəhbəri Maykl Dayk tərəfindən “başqa bir dünyaya daxil olmaq” kimi təsvir edilən bu nəhəng konstruksiyanın içinə eyni anda 20 ədəd Empire State binasının sığa biləcəyi bildirilirdi. Lakin hazırda tikinti sahəsində işlər yalnız bünövrə qazıntıları mərhələsində dayanıb.
