Yeganə eyham Vladimir Putindən gəlib, lakin o da dondurulmuş Rusiya vəsaitlərindən istifadə şərti ilə...
Poliqon xəbər verir ki, bu barədə The Washington Post qəzetinin köşə yazarı Maks But yazıb. Müəllif qeyd edir ki, hələlik heç bir ölkənin Donald Trampın təşəbbüsü ilə gündəmə gətirilən “Sülh Şurası”na üzvlük üçün tələb olunan 1 milyard dollarlıq üzvlük haqqını ödəməyə hazır olduğuna dair konkret əlamət yoxdur. Onun fikrincə, bu ideya daha çox siyasi jest xarakteri daşıyır və real beynəlxalq dəstəkdən uzaq görünür.
Məqalədə qeyd olunur ki, bu istiqamətdə müəyyən eyham vuran yeganə lider Rusiya prezidenti Vladimir Putindir. Lakin Putinin mövqeyi ABŞ-nin dondurulmuş Rusiya aktivlərindən istifadəyə icazə verməsi şərti ilə bağlıdır. Maks But hesab edir ki, bu yanaşma Rusiya lideri üçün ikiqat fayda yaradır: bir tərəfdən, həmin vəsaitlərin Ukraynaya yönəldilməsinin qarşısı alınır, digər tərəfdən isə Donald Trampın siyasi rəğbətini qazanmaq imkanı əldə olunur.
Şərhçi vurğulayır ki, belə bir ssenari həm Vaşinqtonda, həm də Qərb paytaxtlarında ciddi suallar doğurur və Trampın mümkün xarici siyasət kursunun mahiyyəti ilə bağlı narahatlıqları artırır. Onun fikrincə, “Sülh Şurası” ideyası ətrafında gedən müzakirələr daha çox geosiyasi alver elementi daşıyır və praktiki reallaşma ehtimalı hələlik qeyri-müəyyəndir.
Poliqon.info
