Bəşəriyyətin özünü məhv etmə nöqtəsinə məsafə cəmi 85 saniyə olaraq qiymətləndirilib…
Poliqon xəbər verir ki, “Qiyamət saatı”nın əqrəbləri müşahidələrin başladığı vaxtdan bəri ən təhlükəli mövqeyə - gecə yarısına cəmi 85 saniyə qalmış vəziyyətə gətirilib. Reuters Agentliyinin yazdığına görə, ekspertlərin qiymətləndirməsinə əsasən, bəşəriyyət heç vaxt indiki qədər özünü məhv etmə həddinə yaxın olmayıb.
Məlumata görə, ABŞ-nin Çikaqo şəhərində yerləşən “Bulletin of the Atomic Scientists” qeyri-kommersiya təşkilatı bu il saatın göstəricisini dörd saniyə irəli çəkib. Beləliklə, mövcud vəziyyət ötən illə müqayisədə daha riskli hesab olunur. Təşkilat qərarı qlobal təhlükəsizlik mühitində artan qeyri-sabitlik, geosiyasi gərginliklər və nüvə riskləri ilə əsaslandırır.
Xatırladılır ki, “Qiyamət saatı” ilk dəfə 1947-ci ildə, Soyuq müharibə dövründə yaranmış beynəlxalq gərginlik fonunda təsis edilib. Simvolik mexanizm bəşəriyyətin nüvə müharibəsi, iqlim dəyişikliyi və digər qlobal təhdidlər qarşısında nə dərəcədə təhlükəli vəziyyətdə olduğunu göstərmək məqsədi daşıyır.
Poliqon.info
