Şəmkir Rayon İcra hakimiyyəti, Qərbi Azərbaycan İcmasının (QAİ) rayon nümayəndəliyi və təhsil sektorunun birgə təşkilatçılığı ilə Əliyaqublu kənd tam orta ümumtəhsil məktəbində "Qərbi Azərbaycan tarixi Azərbaycan diyarıdır" mövzusunda açıq dərs təşkil olunmuşdur.
Xatırladaq ki, bu kəndin sakinlərinin 92 faizdən çoxunu 1918-ci, 1924-cü illərdə erməni daşnak silahlılarının zülm və işgəncələri nəticəsində, habelə 1948-ci il dövlət səviyyəsində həyata keçirilən deportasiya zamanı öz dədə-baba yurdunu məcburən tərk etmiş ailələr, onların sağ qalan varisləri təşkil edir. Açıq dərsə kənddə yaşayan Qərbi Azərbaycan kökənli, xüsusən də Masis və Amasiya rayonlarından vaxtilə köç etmiş ailələrdən olan valideynlər də dəvət edilmişdilər.
Açıq dərs məktəbin tarix müəllimi Asəf Əliyev və coğrafiya müəllimi Günəş Rzayevanın mederatorluğu ilə davam etdirildi. Açıq dərsin ruhunu Prezident İlham Əliyevin 2024-cü ilin sonlarında Qərbi Azərbaycan İcmasının inzibati binası ilə tanışlıq zamanı çıxışında "Əminəm ki, gün gələcək və Qərbi Azərbaycandan olan soydaşlarımız, onların yaxınları, uşaqları, nəvələri tarixi diyarımız olan Qərbi Azərbaycan diyarına qayıdacaqlar. Mən əminəm ki, bu gün gələcək və əminəm ki, qərbi azərbaycanlılar böyük coşqu və həvəslə öz doğma torpaqlarına qayıdıb orada yaşayacaqlar" deməsi təşkil edirdi.
Açıq dərsin gedişində şagirdlərə bir daha açıqlandı ki, Qərbi Azərbaycan bizim tarixi torpağımızdır, bunu arxiv materialları, xəritələr, habelə minilliklərə söykənən mədəni irisimiz, abidələrimiz, inanc yerlərimiz, qəbiristanlıq və məscidlərimiz də təsdiqləyir. Şagirdlərə Qərbi Azərbaycanla bağlı həqiqətləri bilməsi, qədim yurd yerlərimizin tarixini, mədəniyyətini, adət-ənənələrini yaşatmalı olduqları genişliyi ilə izah edildi. Qərbi Azərbaycan İcması İdarə Heyətinin üzvü, filologiya elmləri doktoru, professor, Əməkdar müəllim Mahirə Hüseynovanın iştirakçılara ünvanladığı məktubu oxundu. Məktəbdə təşkil edilən açıq dərsin azərbaycançılıq tarixinə və xalqımızın mənəvi sərvətlərinə təəssübkeş münasibət olduğu diqqətə çatdırıldı. Qeyd edildi ki, orta məktəblərdə Qərbi Azərbaycana qayıdışla bağlı açıq dərslərin keçirilməsi gənclərimizin tarixi irsimizə sahib çıxmasına güclü təkan verəcək.
Dərsin gedişində "Dövlət başçısı İlham Əliyevin Qərbi Azərbaycanla bağlı yürütdüyü siyasət beynəlxalq hüquqa əsaslanan Qayıdış Konsepsiyasıdır" adlı videoçarx nümayiş etdirildi.
QAİ-nin Şəmkir rayon nümayəndəsi Altay Qafarov, rayon icra hakimiyyətinin məsul işçisi Rəşad Ramazanov, rayon təhsil sektorunun nümayəndəsi Azər Əliyevin, bələdiyyə sədri Niyaməddin Mustafayevin, kənd inzibati ərazi nümayəndəsi Turan Qafarovun və qərbi azərbaycanəsilli valideynlərin müşayiəti ilə böyük maraqla keçən açıq dərsin sonunda iştirakçılara "Mənim Qərbi Azərbaycanım", eləcə də Qərbi Azərbaycanla bağlı digər kitablar hədiyyə edildi.
Ziyafət ASLANOVA,
Şəmkir rayonunun Əliyaqublu kənd orta ümumtəhsil məktəbinin direktor əvəzi, qabaqcıl təhsil işçisi
