ABŞ Hərbi Dəniz Qüvvələrinin "Columbia" sinifli sualtı qayıqların tikintisi proqramı ciddi çətinliklərlə qarşılaşıb. Hazırda "USS District of Columbia" (SSBN-826) adlı aparıcı gəmi 60%-dən çox hazırdır. Lakin o, planlaşdırılan vaxtdan təxminən 17 ay gec təhvil veriləcək. Bunun 2029-cu ildə baş verməsi gözlənilir...
Poliqon xəbər verir ki, bu barədə 1945 resursu yazır.
Ümumilikdə bu sinifdən 12 sualtı qayığın inşası planlaşdırılır. Onlar köhnəlmiş 14 "Ohio" sinifli qayığı əvəz etməlidir. Yeni sualtı qayıqlar "gəminin istismar müddətinə bərabər xidmət ömrü" olan – təxminən 40 il işləyə bilən nüvə reaktoru ilə təchiz olunacaq. Bu isə orta müddətdə yanacağın yenidən doldurulmasına ehtiyacı aradan qaldırır və daha kiçik, daha səmərəli donanma qurmağa imkan verir.
"Columbia" sinifli qayıqlar: nə məlumdur?
Ballistik raketli "Columbia" sinifli sualtı qayıqların tikintisi proqramı ölkənin nüvə çəkindirmə potensialının qorunması üçün əsas əhəmiyyət daşıyır. Lakin proqram tikinti mərhələsindən tutmuş strateji məsələlərə qədər müxtəlif çətinliklərlə üzləşir.
Müəllif qeyd edir ki, qlobal nüvə rəqabətinin gücləndiyi, xüsusən də Rusiya və Çinlə gərginliyin artdığı bir dövrdə "Ohio" sinfindən "Columbia" sinfinə fasiləsiz keçidi təmin etmək dənizdə daimi çəkindirmənin saxlanması üçün həyati əhəmiyyət daşıyır.
Yeni sualtı qayıqların hər biri təxminən 560 fut (170 metr) uzunluğa və sualtı vəziyyətdə 20 min tondan çox suyeritmə qabiliyyətinə malik olacaq. Bu da onları ABŞ Hərbi Dəniz Qüvvələri üçün indiyədək inşa edilmiş ən böyük sualtı qayıqlara çevirəcək.
"Ballistik raketli sualtı qayıqlar SSBN kimi işarələnir, çünki onlar nüvə energetik qurğunu (S), ballistik raketləri (B) birləşdirir və strateji nüvə çəkindirməsi (N) üçün nəzərdə tutulur. SSBN-lərin əsas rolu dənizdə gizli qalaraq uzunmüddətli çəkindirmə patrulları aparmaq və zərurət yaranarsa, sualtı qayıqdan buraxılan ballistik raketləri (SLBM) işə salmağa hazır olmaqdır. Bu, etibarlı ikinci zərbə qabiliyyətini təmin edir", deyə materialda qeyd edilir.
SSBN-lər ABŞ-ın nüvə triadasının əsas komponentlərindən biridir. "Columbia" sinifli qayıqlar 16 ədəd "Trident II" (UGM-133) sualtı bazalı ballistik raket daşıyacaq. Hər bir raket Yer kürəsinin istənilən nöqtəsinə bir neçə döyüş başlığı çatdıra bilər.
Tikinti hansı mərhələdədir?
Birinci "Columbia" sinifli sualtı qayığın – "USS District of Columbia"nın tikintisinə 2021-ci ildə başlanıb. Son hesabatlara görə, hazırda o, 60% hazırdır. Əsas konstruksiya modulları artıq "General Dynamics Electric Boat" zavodunda yekun yığılma çərçivəsində birləşdirilməyə başlanır. Lakin proqramın qrafiki dəyişib.
"Aparıcı gəminin təhvil verilməsi indi 2029-cu ilə planlaşdırılır ki, bu da əvvəlki planlardan təxminən 17 ay gecdir. İkinci və üçüncü qayıqlar – "USS Wisconsin" (SSBN-827) və "USS Groton" (SSBN-828) – tikinti mərhələsindədir və ya tezliklə tikintisinə başlanacaq. Onların təhvil müddəti 2030-cu illərin əvvəllərinə planlaşdırılır", deyə müəllif izah edir.
ABŞ Hərbi Dəniz Qüvvələri "Columbia" sinifli ballistik raketli sualtı qayıqlar donanmasının 2040-cı illərin əvvəllərində tam əməliyyat hazırlığına çatacağını gözləyir — bir şərtlə ki, qrafikdə yeni gecikmələr olmasın.
Poliqon.info
