“Rodriges Venesuelanın enerji sektorunu Amerika şirkətləri üçün açacağını, istehsala güzəştli çıxışı təmin edəcəyini və neft gəlirlərinin Amerika mallarının alınmasına yönəldiləcəyini vəd edib”,– ABŞ-nin dövlət katibi yanvarın 27-də Konqres üzvləri qarşısında çıxışında deyib.
Bu, yanvarın 3-də ABŞ-nin Venesuelanın keçmiş prezidenti Nikolas Maduronu və onun həyat yoldaşını oğurlamasından sonra Marko Rubionun Konqres qarşısında ilk ictimai çıxışı olub.
 |
| Venesuela:islahatlar və təqiblər ayrıcında |
Lakin demokratlar Karakasdakı əməliyyatı Konqresdən yan keçməklə həyata keçirilmiş qeyri-qanuni müharibə aktı kimi tənqid ediblər. Onların fikrincə, bu addım ABŞ-ni Venesuelanı bərpa etmək üçün uzunmüddətli öhdəlik götürmək riski ilə üz-üzə qoyub.
Bundan əvvəl Delsi Rodriges Nikolas Maduronun tutulmasından sonra ABŞ-nin onu və digər hökumət rəsmilərini öldürməklə hədələdiyini, onlardan 15 dəqiqə ərzində əməkdaşlıqla bağlı qərar vermələrini tələb etdiyini bildirmişdi. Xanım Rodriges həmçinin Venesuelanın neft sektorunda islahatlar aparılması planlarını açıqlayıb.
Yeri gəlmişkən, “The New York Times” (NYT) nəşrinin yazdığına görə, Delsi Rodriges Venesuela iqtisadiyyatını liberallaşdırmağa başlasa da, hakimiyyətin əsas strukturlarını qoruyub saxlayıb.
Sahil İsgəndərov
AzVision.az
