Türkiyə kəşfiyyat və hüquq-mühafizə orqanları İncirlik Hava Bazası ərazisində kəşfiyyat fəaliyyəti aparan və sui-qəsd dəstələri yaratmağı planlaşdıran İran casus dəstəsini dağıtdığını açıqlayıb.
Azreform.info -ın məlumatına görə, Türkiyənin Milli Kəşfiyyat Təşkilatı (MİT) və polisi əsasən İstanbul ərazisində olmaqla beş vilayətdə əməliyyat keçirib və altı şübhəli saxlanılıb.
Həbs olunanlar arasında müdafiə sənayesi şirkətlərinin sahibləri Erhan Ergelen və Taner Özkan, tekstil sahibkarları Cemal Beyaz və Remzi Beyaz, Alikan Koç və İran vətəndaşı Aşkan Cəlali də var.
Hər altı nəfər İstanbul Cinayət Məhkəməsi tərəfindən "siyasi və ya hərbi kəşfiyyat məqsədilə dövlət sirlərini əldə etmək" ittihamı ilə həbs edilib.
Türkiyə mediasının məlumatına görə, istintaq casus dəstəsinə "Hacı" kod adı ilə tanınan İran kəşfiyyat zabitləri Nəcəf Rostami və "Doktor" kimi tanınan Mehdi Yeke Dehqan tərəfindən rəhbərlik edildiyini müəyyən edib.
İstintaqa görə, Rostami Vanda yaşayan Alikan Koça Adanadakı İncirlik hava bazasında foto və video çəkilişləri üçün şəxslər seçməyi tapşırıb.
Müstəntiqlər müəyyən ediblər ki, Ankarada yaşayan İran vətəndaşı Aşkan Cəlali Türkiyədən Şimali Kipr Türk Respublikasına (ŞKTR) döyüş dronları göndərməyi, eləcə də "Bulaq Robotik" və "Arete Industries" şirkətləri vasitəsilə Yunan Kiprində əməliyyatları idarə etməyi planlaşdırırmış.
Hakimiyyət orqanlarının məlumatına görə, Cəlali və Koç 2025-ci ilin avqust-sentyabr aylarında İranda pilotsuz uçuş aparatlarının idarə olunması üzrə ixtisaslaşmış təlim keçiblər.
Bundan əlavə, istintaq materiallarında qeyd edildiyi kimi, Erhan Ergelen və Taner Özkan 2025-ci ilin oktyabr ayında İrana səfər edib və Kiprin yunan hissəsinə dronların çatdırılmasında iştirak ediblər.
