Bakı, 29 yanvar, AZƏRTAC
NASA Beynəlxalq Kosmik Stansiyaya (BKS) növbəti ekipajlı missiyanın buraxılış tarixini daha əvvələ çəkdiyini elan edib. “Crew-12” missiyasının fevralın 11-də başlaması planlaşdırılır və heyət orbitə çıxıb stansiyadakı azaldılmış heyəti əvəz etməlidir.
AZƏRTAC NASA-nın məlumatına istinadla xəbər verir ki, hazırda Beynəlxalq Kosmik Stansiyada yalnız üç nəfər çalışır; bu heyət texniki xidmət göstərir və elmi təcrübələr aparır. Belə bir vəziyyət “Crew-11” heyətinin yanvarın 14-də Yerə erkən qayıtmasından - stansiyanın ilk tibbi təxliyəsindən sonra yaranıb.
“Crew-12” missiyası əvvəlcə “Crew-11” heyətinin əvəzi kimi planlaşdırılırdı və əvvəlki astronavt komandası Yerə qaytarmazdan əvvəl qısa müddət orbitdə onlarla birlikdə işləməli idi. Missiyanın əvvəlcə fevralın 15-də başlaması planlaşdırılırdı, lakin NASA və “SpaceX” şirkəti “Crew Dragon” kosmik gəmisini və “Falcon 9” buraxılış vasitəsini əvvəlcədən hazırlaya bilib. “Crew-12” heyətinə NASA astronavtları Cessika Meir (missiya komandiri) və Cek Hetevey (pilot), eləcə də missiya mütəxəssisləri - Avropa Kosmik Agentliyinin astronavtı Sofi Adeno və “Roskosmos”un kosmonavtı Andrey Fedyayev daxildirlər.
Dörd nəfər “Crew Dragon Grace” kosmik gəmisi ilə Beynəlxalq Kosmik Stansiyaya yola düşəcək və orbitdə doqquz ay keçirəcək ki, bu da standart altıaylıq missiya müddətini aşacaq.
Bu, Cessika Meir və Andrey Fedyayev üçün ikinci uçuş, həm də rus kosmonavtın ikinci uzunmüddətli missiyası olacaq. Cek Hetevey və Sofi Adeno ilk dəfə kosmosa uçacaqlar.
“Crew-12” missiyasının buraxılış aqreqatı 2026-cı il fevralın 11-də açılır. Buraxılış Florida ştatındakı “Cape Canaveral” Hərbi Hava Qüvvələri bazasında yerləşən 40 nömrəli start kompleksindən həyata keçiriləcək.
