Rusiyanın "Lukoil" neft şirkəti Kişinyov Beynəlxalq Hava Limanındakı aktivlərini Moldovanın dövlət mülkiyyətinə təhvil verdi. Bu barədə Moldova Energetika Nazirliyinin mətbuat xidməti məlumat verib.
Departamentdən verilən məlumata görə, Dövlət Əmlak Agentliyi və Kişinyov Beynəlxalq Hava Limanı inventarlaşdırma prosesini başa çatdırıb və 29 yanvarda "Lukoil-Moldova" ilə hava limanının ərazisində yerləşən neft kompleksinin qəbul və təhvil aktını imzalayıblar. Beləliklə, "Lukoil" şirkətinə məxsus hava limanındakı aktivlər İnvestisiyaların İcmalı Şurasının qərarına uyğun olaraq dövlətə təhvil verilib.
15 yanvarda Moldova Energetika Nazirliyinin rəhbəri Dorin Cunqietu bildirib ki, ABŞ sanksiyaları "Lukoil" şirkətini Moldovadakı bütün aktivlərini satmağa məcbur edir.
23 oktyabrda ABŞ Maliyyə Nazirliyi Rusiyanın ən böyük neft şirkətlərinə qarşı sanksiyaların tətbiq olunduğunu elan etdi. Bir neçə gün sonra "Lukoil" tətbiq olunan məhdudiyyətlər səbəbindən xarici aktivlərini satmaq niyyətində olduğunu açıqladı.
