ABŞ Prezidenti Donald Tramp yaxın saatlarda ölkədə reseptlə satılan dərmanların qiymətlərinin kəskin şəkildə aşağı salınmasına yönəlmiş yeni təşəbbüsünü təqdim edəcək.
AFN.az xəbər verir ki, bu barədə Ağ Evin mətbuat katibi Karolin Levitt brifinq zamanı məlumat verib.
Onun sözlərinə görə, fevralın 5-i axşam saatlarında (Bakı vaxtı ilə fevralın 6-sı sübh saatlarında) Tramp rəsmən "Trump Rx" layihəsini elan edəcək. Bu, Amerika istehlakçılarına reseptli preparatları birbaşa istehsalçıdan və aşağı qiymətlərlə almağa imkan verən müasir bir onlayn platformadır.
Layihə sayt vasitəsilə vətəndaşlar sığorta şirkətlərini və vasitəçiləri (aptek menecerlərini) kənarda qoyaraq, dərmanları birbaşa əczaçılıq zavodlarından ala bilmələrinə şərait yaradacaq. Platformada qiymətlərin "Ən Çox Üstünlük Verilən Millət" (Most Favored Nation) prinsipi ilə, yəni inkişaf etmiş digər ölkələrdəki (Kanada, Almaniya və s.) ən aşağı qiymətlərə uyğunlaşdırılması nəzərdə tutulur.
Layihəyə artıq "Pfizer", "Eli Lilly" və "Novo Nordisk" kimi nəhəng şirkətlər qoşulub. Məsələn, arıqlamaq üçün istifadə edilən məşhur "Ozempic" və "Wegovy" preparatlarının qiymətinin platformada 1000 dollardan 350 dollara düşəcəyi gözlənilir.
Ağ Ev bu addımı "Amerika xəstələri üçün tarixi qələbə" kimi qiymətləndirir. "Trump Rx" portalının xüsusilə tibbi sığortası olmayan və ya sığortası dərman xərclərini tam qarşılamayan milyonlarla amerikalıya kömək edəcəyi bildirilir. Təqdimatda Səhiyyə Nazirliyinin (HHS) nümayəndələrinin və tanınmış həkim Mehmet Özün də iştirak edəcəyi gözlənilir.
