Dünya birjalarında neft qiymətləri kəskin dalğalanmalar fonunda artıb.
NOCOMMENT.az xəbər verir ki, dünya bazarlarında neft qiymətləri cümə günü əvvəlki ticarət sessiyasında yaşanan kəskin enişdən sonra 1%-dən çox artıb. Qiymətlərdəki yüksək volatillik ABŞ və İran ətrafında baş verən hadisələrlə əlaqələndirilir.
Bununla belə, enerji daşıyıcılarının qiymətləri təchizatla bağlı narahatlıqların azalması və ABŞ–İran danışıqlarının nəticələrinə dair gözləntilər fonunda son iki aya yaxın müddətdə ilk həftəlik enişə doğru irəliləyir.
Londonun ICE birjasında Brent markalı neftin fyuçersləri 0,78 dollar və ya 1,2% bahalaşaraq bir barel üçün 68,33 dollara çatıb. ABŞ-nin West Texas Intermediate (WTI) markalı nefti isə 0,8 dollar və ya 1,3% artaraq 64,09 dollara yüksəlib.
Buna baxmayaraq, Brent həftəni ümumilikdə 3,3% itki ilə başa vurmağa hazırlaşır. Bu göstərici yanvarın sonundakı maksimum səviyyələrlə müqayisədə 4,8% aşağıdır. WTI isə həftəlik ifadədə 1,8% ucuzlaşmağa doğru gedir və ötən ay qeydə alınmış təxminən altı aylıq maksimumdan 3,4% aşağı səviyyədədir.
Analitiklər qeyd edirlər ki, İran və ABŞ arasında gərginliyin istənilən eskalasiyası qlobal neft tədarükünü poza bilər. Belə ki, dünya üzrə gündəlik neft istehlakının təxminən beşdə biri Omanla İran arasında yerləşən Hörmüz boğazından daşınır.
Aliyə
