Piyada gəzinti ürək sağlamlığını möhkəmləndirməyin, düzgün duruşu qorumağın, demensiya riskini azaltmağın və stresslə mübarizənin ən əlçatan və effektiv üsullarından biridir.
BAKU.WS-in məlumatına görə, bu barədə məşqçi İrina Malçeva "Gazeta.ru"ya açıqlamasında bildirib.
Onun sözlərinə görə, müntəzəm gəzintilər arterial təzyiqi və "pis" xolesterinin səviyyəsini azaldır, infarkt və insult riskini aşağı salır. Həmçinin ayaq, bel və kor (bədənin mərkəzi) əzələlərini gücləndirir, osteoporoz və artritin profilaktikasında mühüm rol oynayır.
Malçeva qeyd edib ki, piyada gəzinti maddələr mübadiləsini sürətləndirir, çəkiyə nəzarətə kömək edir və beynin qanla təchizatını yaxşılaşdıraraq yaddaşı və zehni aydınlığı qoruyur. Xüsusilə park və meşəlik ərazilərdə edilən gəzintilər narahatlığı azaldır, əhval-ruhiyyəni yüksəldir və yuxu keyfiyyətini yaxşılaşdırır.
Mütəxəssis optimal müddətin gündə 30–60 dəqiqə olduğunu bildirib. Onun sözlərinə görə, düzgün texnika vacibdir: bel düz saxlanılmalı, baxış irəli yönəlməli, qollar dirsəkdən bükülərək hərəkət etməli, addım isə dabanla başlayıb barmaq uclarında tamamlanmalıdır.
Orta temp nəfəs darlığı olmadan danışmağa imkan verməlidir. Sağlamlıq üçün saatda 5–6 km sürət kifayətdir, arıqlamaq istəyənlər üçün isə saatda 7 km və daha sürətli, eləcə də yoxuşlu intervallı gəzintilər daha effektivdir.
Yeni başlayanlara 15–20 dəqiqəlik gəzintilərlə, həftədə 3–4 dəfə başlamaq və tədricən gündəlik 7,5–10 min addıma çatmaq tövsiyə olunur. Arıqlamaq üçün isə yalnız gəzinti deyil, ümumi kalori defisiti əsas şərtdir.
Malçeva sonda rahat ayaqqabı seçməyin və gündəlik həyatda daha çox piyada hərəkət etməyin – məsələn, bir dayanacaq əvvəl düşməyin və ya avtomobili girişdən bir qədər uzaqda saxlamağın – uğurun açarı olduğunu vurğulayıb.
