Rusiya Təhlükəsizlik Şurası sədrinin müavini ABŞ prezidentinin hətta bəzi NATO ölkələrini Vaşinqtonun düşmənləri siyahısına daxil etdiyini bildirib...
Rusiya Təhlükəsizlik Şurası sədrinin müavini Dmitri Medvedev ABŞ prezidenti Donald Trampın dünya ölkələrini şərti olaraq “iki sütuna” ayırdığını bəyan edib.
Poliqon xəbər verir ki, bu barədə “RİA Novosti” Agentliyi məlumat yayıb.
Medvedevin sözlərinə görə, Tramp dövlətləri “dostlar” və “düşmənlər” kimi təsnifləşdirir və bu bölgünü açıq şəkildə ifadə edir.
“O, hamını iki sütuna bölüb və deyir: ‘Bunlar bizim dostlarımızdır, onlarla işləyirik, onlara rüsumları azaldırıq. Bunlar isə bizim düşmənlərimizdir’”, deyə Medvedev bildirib.
Rusiya rəsmisi qeyd edib ki, ABŞ prezidentinin bu yanaşması kifayət qədər sərt və “həddindən artıq iddialı” formada təqdim olunub. Onun fikrincə, nəticədə NATO-ya üzv olan bəzi ölkələr belə Vaşinqtonun mövqeyindən təəccübləniblər. Medvedev iddia edib ki, Trampın ritorikası və iqtisadi alətlərdən istifadə tərzi alyans daxilində müəyyən çaşqınlıq yaradıb.
Bununla yanaşı, Medvedev daha əvvəl Donald Trampın üstün cəhətlərindən biri kimi onun rusofob olmamasını göstərib. O bildirib ki, Tramp Rusiya ilə münasibətlərdə ideoloji qarşıdurmadan daha çox praqmatik yanaşmaya üstünlük verir.
Təhlükəsizlik Şurası sədrinin müavini əlavə edib ki, Tramp siyasi irsində sülhməramlı kimi qalmağa çalışır. Medvedevin fikrincə, məhz bu məqsəd ABŞ və Rusiya arasında təmasların intensivliyinə də təsir göstərib. O vurğulayıb ki, Trampın prezidentliyi dövründə Rusiya-ABŞ əlaqələri daha məhsuldar xarakter alıb və bu, “ümumi işin xeyrinədir”.
Medvedevin açıqlamaları fonunda ekspertlər qeyd edirlər ki, Trampın xarici siyasətdə iqtisadi rıçaqlardan, xüsusilə gömrük rüsumları və ticarət mexanizmlərindən təzyiq aləti kimi istifadə etməsi beynəlxalq münasibətlər sistemində yeni balans axtarışlarına səbəb olur.
Poliqon.info
