Birləşmiş Krallıq Ukrayna üçün Amerika silahları alacaq.
"Böyük Britaniyanın PURL çərçivəsində 150 milyon funt sterlinq öhdəlik götürdüyünü təsdiqləməkdən məmnunam", - deyə Britaniya müdafiə naziri Con Heli NATO-nun yaratdığı Ukrayna dəstək proqramına istinadən Politico-ya bildirib. Heli əlavə edib ki, Qərb ölkələri "Ukraynaya vacib hava hücumundan müdafiə imkanları təmin etmək" üçün birlikdə çalışmalıdırlar.
Böyük Britaniyanın müdafiə naziri London tərəfindən ayrılan vəsaitin dəqiq nəyə istifadə olunacağını dəqiqləşdirməyib.
Nəşrin qeyd etdiyi kimi, ötən il PURL çərçivəsində Ukrayna Silahlı Qüvvələri üçün 5 milyard dollar dəyərində silah toplanıb. Məqalədə deyilir ki, bu ayın əvvəlində NATO-nun baş katibi Mark Rutte ittifaq üzvü ölkələrin bu il bu məqsədlər üçün əlavə 15 milyard dollar cəlb edə biləcəyinə əminliyini bildirib.
Nəşr iki adı açıqlanmayan NATO diplomatına istinadən bildirir ki, alyansın üzvlərinin üçdə ikisi artıq proqramda iştirak etməyə öhdəlik götürüb. 10 fevralda Yaponiya hökuməti PURL-a qoşulmaq qərarını elan etdi. Tokio ABŞ-dan öldürücü olmayan avadanlıq və ləvazimatlar almaq niyyətindədir. Xüsusilə, bu, radar sistemləri və bədən zirehlərinə aiddir.
PURL proqramı ötən yay NATO tərəfindən ABŞ-ın Kiyevə pulsuz silah verilməsini dayandırmaq qərarına cavab olaraq yaradılıb. Bu proqram çərçivəsində Kiyev hərbi ehtiyaclarını formalaşdırır, AB ölkələri vəsait ayırır, bu silahları ABŞ-dan alır və Ukraynaya pulsuz verir.
Əziz Mustafa
