“Arktika keşikçisi” proqramı daha çox siyasi və simvolik xarakter daşıyır...
NATO-nun Arktika regionunda mövcudluğunu gücləndirməsi ilk baxışda Rusiyanın qarşısının alınmasına yönəlik addım kimi təqdim edilsə də, əslində bu təşəbbüsün əsas hədəfinin ABŞ Prezidenti Donald Trampın mövqeyinə təsir göstərmək olduğu bildirilir.
Poliqon xəbər verir ki, bu barədə Politico nəşri alyans daxilindəki mənbələrə istinadən yazıb.
Məlumata görə, dünən start götürən “Arktika keşikçisi” (Arctic Guardian) proqramı mahiyyət etibarilə yeni hərbi strategiya deyil, daha çox mövcud fəaliyyətlərin yenidən adlandırılması və ictimaiyyətə fərqli təqdimatıdır. Nəşr qeyd edir ki, təşəbbüs ABŞ administrasiyasının Arktika ilə bağlı artan ritorikasına cavab olaraq irəli sürülüb və Vaşinqtonun təzyiqlərini yumşaltmağa xidmət edir.
Politico mövzu ilə bağlı NATO-ya üzv ölkələrdən 13 diplomat, alyans rəsmisi və hərbi analitiklə söhbət aparıb. Mənbələr bildiriblər ki, ABŞ-nin intensiv təzyiqləri nəticəsində NATO daxilində Arktika regionuna münasibətdə müəyyən dəyişiklik baş verib. Lakin bu dəyişikliklərin əsas motivasiyası hərbi zərurətdən daha çox siyasi amillərlə bağlıdır.
Ekspertlər hesab edirlər ki, Arktikada təhlükəsizliklə bağlı narahatlıqlar xeyli dərəcədə şişirdilib. Onların fikrincə, NATO hərbi və texnoloji imkanlar baxımından Rusiyanın Arktikadakı potensial addımlarına adekvat cavab vermək gücündədir və əlavə genişmiqyaslı tədbirlərə real ehtiyac yoxdur.
Norveç Beynəlxalq Münasibətlər İnstitutunun elmi əməkdaşı və Arktika təhlükəsizliyi üzrə ekspert Karsten Friis bildirib ki, yeni proqramın əsasən mövcud tədbirlərin yenidən adlandırılması ilə məhdudlaşacağı gözlənilir: “Ümid edirəm ki, onlar sadəcə hazırkı fəaliyyətlərin adını dəyişəcəklər”.
NATO diplomatlarından biri isə etiraf edib ki, Arktikada təhlükə daha çox hipotetik xarakter daşıyır: “Təhlükə realdan daha çox nəzəri xarakterlidir”. O əlavə edib ki, təşəbbüsün açıq şəkildə “simvolik və kommunikasiya aspekti” var və bu, alyansın daxili və xarici auditoriyalara mesaj vermək məqsədi güdür.
Beləliklə, Politico-nun təhlilinə əsasən, NATO-nun Arktikada fəallığının artırılması hərbi eskalasiyadan çox siyasi balans və alyansdaxili koordinasiyanı təmin etməyə yönəlib. Bu isə Arktika məsələsinin beynəlxalq təhlükəsizlikdən əlavə, böyük güclər arasında siyasi münasibətlərin alətinə çevrildiyini göstərir.
Poliqon.info
