Amerikalıların həmişə cəlbedici biznes təklifləri olsa da, ABŞ-də hələ bir dənə də olsun kiçik modul reaktor tikilməyib.
Redaktor.az xəbər verir ki, bunu Sergey Şoyqu RIA Novosti-yə Vaşinqtonun Ermənistanda kiçik modul nüvə reaktorları tikmək planlarını şərh edərkən bildirib.
Şoyqu qeyd edib ki, amerikalılar hələ bir dənə də olsun kiçik modul reaktor tikməyiblər, onu işə salmağı bir yana qoyaq, sənaye istismarını da təcrübədən keçirməyiblər.
Təhlükəsizlik Şurasının katibi əlavə edib ki, Ermənistanda nüvə elektrik stansiyası üçün kiçik reaktorların tikintisi, çox güman ki, kreditlə maliyyələşdiriləcək və layihənin xərcləri ölkənin gələcək nəsilləri tərəfindən ödəniləcək. ABŞ isə istehsal olunacaq hər meqavat-saat enerjinin təxmini qiymətini belə göstərməyib.
Şoyqu bildirib ki, əgər Ermənistan Amerika texnologiyasından istifadə edərək reaktorlar tikməyə başlayarsa, Rusiya yeni nüvə təhlükəsizliyi risklərini nəzərdən keçirməli olacaq. O həmçinin xəbərdarlıq edib ki, ABŞ-nin işlənmiş nüvə yanacağını təkrar emal etmək texnologiyası yoxdur, buna görə tullantılar mütləq Ermənistanda saxlanılacaq.
Aminə ŞAHSUVARQIZI
