Yanvar ayında qlobal elektrikli nəqliyyat vasitələrinin satışı illik müqayisədə 3 faiz azalaraq 1,2 milyona düşüb.Bu barədə İqtisadiyyat.az “Bloomberg”ə istinadən xəbər verir.Müvafiq olaraq, ötən ay qlobal miqyasda 1,2 milyon elektrikli nəqliyyat vasitəsi satılıb. Bu rəqəm elektrikli nəqliyyat vasitələrinin satışlarında illik 3 faiz, aylıq isə 44 faiz azalma olduğunu göstərir. Çində vergi və təşviq dəyişiklikləri, o cümlədən ABŞ-də siyasət tədbirləri səbəbindən qlobal elektrikli nəqliyyat vasitələrinin qeydiyyatı yanvar ayında azalıb.Çində əksər elektrikli nəqliyyat vasitələri 2014-cü ildən bəri ilk dəfə olaraq alış vergisinə cəlb edilib. Bundan əlavə, ölkədə elektrikli nəqliyyat vasitələri üçün subsidiyalar ötən illə müqayisədə azaldılıb.Ən kəskin azalmalar Çin və Şimali Amerikada müşahidə olunub, Avropa və digər bölgələrdə isə artımlar davam edib. Avropada elektrikli nəqliyyat vasitələrinin satışları bu dövrdə illik müqayisədə 24% artaraq 320 minə çatıb, lakin əvvəlki aya nisbətən bu göstərici 33% azalıb.Dünyanın qalan hissəsində elektrikli nəqliyyat vasitələrinin satışı illik müqayisədə 92 faiz artaraq 190 minə çatıb. Böyük Britaniya, Almaniya və Fransa bu yaxınlarda subsidiya proqramlarını bərpa edərək illik artım templərini müvafiq olaraq 14%, 25% və 41% olaraq qeydə alıblar.Əlavə edək ki, ötən il Azərbaycana ümumilikdə 62,4 milyon dollar dəyərində 2 028 ədəd elektrikli avtomobil idxal olunub. Bu dövrdə elektrikli avtomobil idxalına çəkilən xərc 48,6% azalıb.
