Qərbin artan təzyiqləri fonunda ixracın zəifləməsi və anbarların dolması risk yaradır...
Poliqon xəbər verir ki, Reuters Agentliyinin analitiki Ron Bousso hesab edir ki, Qərb ölkələrinin artan təzyiqləri yaxın aylarda Rusiyanı neft hasilatını kəskin şəkildə azaltmağa məcbur edə bilər. Ekspertin fikrincə, ixrac məhdudiyyətləri və tələbatın azalması fonunda neft ehtiyatlarının sürətlə artması bu ehtimalı gücləndirir.
Son illərdə Qərbin genişmiqyaslı sanksiyalarına və Avropanın enerji idxalını azaltmasına baxmayaraq, Rusiya neft ixracını ümumilikdə sabit səviyyədə saxlaya bilmişdi. Lakin indi bu davamlılıq risk altına düşür — son aylarda ixracın tempində nəzərəçarpacaq zəifləmə müşahidə olunur.
Analitik şirkət Kpler-in məlumatına görə, Rusiyanın dəniz yolu ilə neft ixracı dekabr ayında gündəlik 3,8 milyon barel olduğu halda, yanvarda 3,4 milyon barelə düşüb, fevralda isə təxminən 2,8 milyon barel səviyyəsinə qədər azalıb. Bu dinamika tələbatın zəiflədiyini və logistika problemlərinin artdığını göstərir.
Eyni zamanda tankerlərdə saxlanılan Rusiya neftinin həcmi rekord səviyyəyə — 150 milyon bareldən çox göstəriciyə çatıb. Bir çox tankerlərin sürətinin azalması da bazarda tələbatın zəifləməsinin əlavə göstəricisi kimi qiymətləndirilir.
Analitiklər bildirirlər ki, Qərbin siyasi təzyiqinin artması, o cümlədən Donald Trump və Avropa paytaxtlarının sərt mövqeyi Moskvanın enerji sektoruna təsiri gücləndirə bilər. Xüsusilə, Avropa Komissiyası tərəfindən Rusiyanın xam neftinin dəniz ixracını dəstəkləyən bütün fəaliyyətlərə tam qadağa qoyulması ilə bağlı təklif mövcud sanksiyalardan daha sərt addım kimi qiymətləndirilir.
Mütəxəssislərin fikrincə, belə məhdudiyyətlər qüvvəyə minərsə, Rusiyanın həm ixrac imkanları azalacaq, həm də hasilatın könüllü və ya məcburi şəkildə azaldılması gündəmə gələ bilər. Bu isə qlobal enerji bazarında qiymət dalğalanmalarını və yeni geosiyasi riskləri artırmaq potensialına malikdir.
Poliqon.info
