Qar uçqunu sərnişin qatarına çırpılıb, relsdən çıxan qatardan təxliyə tədbirləri görülür...
Poliqon xəbər verir ki, İsveçrənin Qoppenştayn kəndi yaxınlığında qar uçqunu sərnişin qatarına çırpılıb və nəticədə qatar relsdən çıxıb. Hadisə barədə ilk məlumatı "Metro" nəşri yayıb.
Bildirilir ki, qatar İsveçrənin Vale kantonu ərazisində hərəkətdə olarkən uçqun relslərə düşüb və qatara zərbə vurub. Təxminən 80 sərnişin daşıyan qatarın relsdən çıxması nəticəsində xəsarət alanların ola biləcəyi ehtimal edilir, lakin onların sayı və vəziyyəti hələ dəqiqləşdirilir.
İsveçrənin dəmir yolu operatoru BLS AG bildirib ki, hadisə məhz qar uçqunu səbəbindən baş verib və sərnişinlərin yaxın vaxtda təhlükəsiz əraziyə təxliyəsi planlaşdırılır. Hadisə yerində xilasedici və fövqəladə xidmət briqadaları fəaliyyət göstərir.
Digər yerli nəşr "20 Minuten" isə uçqunun güclü qar yağışı nəticəsində baş verdiyini yazır. Ekspertlər qeyd edirlər ki, Alp bölgəsində qış mövsümündə intensiv yağıntılar bu cür riskləri artırır və nəqliyyat infrastrukturu üçün əlavə təhlükə yaradır.
Poliqon.info
