İsveçrənin Vale kantonunda bazar ertəsi səhər saatlarında sərnişin qatarı relsdən çıxıb. Yerli polisin sosial media hesabından verdiyi məlumata görə, hadisə səhər saat 07:00 radələrində baş verib.
Rəsmi qurumlar əraziyə müdaxilənin davam etdiyini və qəza nəticəsində yaralananların olduğunu bildiriblər. Polisin Fransız Xəbər Agentliyinə (AFP) verdiyi məlumata görə, qəzanın dəqiq səbəbləri və yaralıların sayı barədə hələlik ətraflı məlumat yoxdur.
İsveçrə Radio və Televiziyası (RTS) qatarın Goppenstein və Briq şəhərləri arasında hərəkət etdiyini açıqlayıb. İsveçrə mətbuatında yer alan xəbərlərə görə, qəza zamanı qatarda təxminən 80 sərnişin olub.
Federal Dəmir Yolları (CFF) tərəfindən verilən açıqlamada bölgədə baş verən qar uçqunu səbəbindən Goppenstein və Briq arasındakı qatar hərəkətinin 17 fevral saat 04:00-a qədər dayandırıldığı qeyd olunub.
Qəzanın baş verdiyi xətt üzrə reyslərin ləğv edilməsi ilə nəqliyyatın hərəkətində fasilələr yaranıb. Qatarın birbaşa uçqun kütləsinə çırpıldığı, yoxsa relslərdəki qar yığınına görə yoldan çıxdığı hələlik dəqiqləşməyib. Briqadaların hadisə yerindəki araşdırmaları davam edir.
