BAKI, 17 fevral. TELEQRAF
ABŞ Prezidenti Donald Tramp Kubaya gedən gəmiləri saxlamağa və yoxlamağa icazə verən əmrin müddətini daha bir il uzadıb.
Teleqraf xəbər verir ki, müvafiq bildiriş ABŞ hökumətinin sənədlərinin rəsmi toplusu olan Federal Reyestrdə dərc edilib.
Qərarın əsaslandırılmasında deyilir ki, Kuba hökuməti şimal sahillərində Amerika gəmilərinə və təyyarələrinə qarşı həddindən artıq güc tətbiq etməyəcəyinə dair zəmanət verməyib.
Sənəddə həmçinin qeyd olunur ki, ABŞ-də qeydiyyatdan keçmiş hər hansı bir gəminin Kubanın ərazi sularına icazəsiz daxil olması Kubadan kütləvi miqrasiya axınına səbəb olmaqla Ağ Evin xarici siyasətinə zərər verə bilər.
ABŞ administrasiyası hesab edir ki, Kubadan genişmiqyaslı miqrasiya ABŞ-nin milli təhlükəsizliyinə təhdid yaradır, çünki bu, ABŞ-nin beynəlxalq münasibətlərinin hazırkı vəziyyətini pozmaq riski yaradır.
Tramp daha əvvəl Kubanın milli təhlükəsizliyə yaratdığı təhdid səbəbindən ABŞ-də milli fövqəladə vəziyyət elan etmişdi .
